-ਮੈਂ ਕੁਝ ਕੁ ਤੁਹਾਨੂੰ ਦੱਸ ਦਿੰਦਾ ਹਾਂ। ਇਹ ਪੂਰੇ ਚਿੰਨ੍ਹ ਨਹੀਂ ਹਨ ਕਿਉਂਕਿ ਸਾਡੇ ਕੋਲ ਇਤਨਾ ਸਮਾਂ ਨਹੀਂ। ਪਰ ਜੇ ਤੁਸੀਂ ‘ਕੁਝ ਹਰਕਤਾਂ ਦਾ ਸਮੂਹ' ਦੇਖੋ ਤਾਂ ਇਹ ਜ਼ਰੂਰ ਤੁਹਾਨੂੰ ਕੁੱਝ ਦੱਸ ਦੇਵੇਗਾ। ਜਿੱਥੇ ਤੁਹਾਨੂੰ ਕੁਝ ਹੋਰ ਪੁਛਣ ਦੀ ਲੋੜ ਮਹਿਸੂਸ ਹੋਵੇ, ਮੈਨੂੰ ਰੋਕ ਲੈਣਾ।
- ਆਪਣੀ ਕਲਾਈ ਅਤੇ ਤਲੀ ਨੂੰ ਸਾਹਮਣੇ ਲਿਆਉਣਾ।
- ਸਿਰ ਨੂੰ ਇਕ ਪਾਸੇ ਵੱਲ ਝੁਕਾਣਾ।
- ਕਿਸੇ ਵੱਲ ਦੇਖਦਿਆਂ ਹੋਇਆਂ ਆਪਣੀਆਂ ਨਜ਼ਰਾਂ ਮੂੰਹ, ਨੱਕ ਵਾਲੇ ਨੇੜਤਾ ਵਾਲੇ ਖੇਤਰ ਵਲ ਝੁਕਾਉਣੀਆਂ-ਜਾਂ ਇਸ ਤੋਂ ਵੀ ਹੋਰ ਹੇਠਾਂ ਵਲ।
- ਪੁਤਲੀਆਂ ਵੱਡੀਆਂ ਹੋ ਜਾਣੀਆਂ-ਜਦੋਂ ਅਸੀਂ ਕਿਸੇ ਨੂੰ ਪਸੰਦ ਕਰਦੇ ਹਾਂ ਤਾਂ ਸਾਡੀਆਂ ਪੁਤਲੀਆਂ ਵੱਡੀਆਂ ਹੋ ਜਾਂਦੀਆਂ ਹਨ।
- ਗਰਦਨ ਅਤੇ ਗਲੇ (ਸਾਹਮਣੇ ਵਾਲੇ ਹਿੱਸੇ) ਨੂੰ ਛੂਹਣਾ।
- ਆਪਣੇ ਵਾਲ ਪਿੱਛੇ ਕਰ ਕੇ ਢੱਕੇ ਹੋਏ ਗਰਦਨ ਅਤੇ ਗਲੇ ਵਾਲੇ ਹਿੱਸੇ ਨੂੰ ਨੰਗਾ ਕਰਨਾ।
- ਹੱਥ ਨਾਲ ਜਾਂ ਸਿਰ ਦੇ ਝਟਕੇ ਨਾਲ ਵਾਲਾਂ ਨੂੰ ਪਿਛੇ ਵੱਲ ਕਰਨਾ।
- ਤੁਹਾਡੇ ਨਾਲ ਨਜ਼ਰਾਂ ਮਿਲਾਈਆਂ ਹੋਈਆਂ ਵਿਚ ਵੀ ਆਪਣੇ ਆਪ ਨੂੰ ਸਵਾਰਨਾ।
- ਬੈਠੇ ਹੋਏ ਅਤੇ ਖੜ੍ਹੇ ਹੋਏ ਅੱਗੇ ਵੱਲ ਨੂੰ ਝੁਕਣਾ।
- ਪੈਰ ਤੁਹਾਡੀ ਦਿਸ਼ਾ ਵਿਚ ਹੋਣੇ।
- ਆਪਣੇ ਕੱਪੜੇ ਅਤੇ ਪੁਸ਼ਾਕ ਨੂੰ ਸਵਾਰਨਾ।
ਪ੍ਰਸ਼ਨ-ਤਾਂ ਫਿਰ ਇਹ ਪੱਕੀਆਂ ਨਿਸ਼ਾਨੀਆਂ ਹਨ?
—ਬਿਲਕੁਲ ਨਹੀਂ। ਜੇ ਤੁਸੀਂ ਕਿਸੇ ਇਕ ਨਿਸ਼ਾਨੀ ਜਾਂ ਹਰਕਤ ਤੇ ਨਿਰਭਰ ਕਰ ਰਹੇ ਹੋ ਤਾਂ ਤੇ ਬਿਲਕੁਲ ਨਹੀਂ। ਜਦੋਂ ਕੋਈ ਔਰਤ ਕਿਸੇ ਮਰਦ ਵਿਚ ਦਿਲਚਸਪੀ ਰੱਖਦੀ ਹੈ (ਜਾਂ 'ਸ਼ਾਇਦ’ ਦਿਲਚਸਪੀ ਰੱਖਦੀ ਹੈ) ਤਾਂ ਇਹ ਹਰਕਤਾਂ ਆਮ ਤੌਰ ਤੇ ਹੁੰਦੀਆਂ ਹਨ। ਪਰ ਮੈਂ ਇਕ ਵਾਰੀ ਫਿਰ ਕਹਾਂਗਾ ਕਿ ਕੁਝ ਕੁ ਹਰਕਤਾਂ ਦਾ ਸਮੂਹ ਦੇਖੋ। ਇਹ ਹਰ ਹਰਕਤ ਇਕ ਸ਼ਬਦ ਹੈ। ਜਦ ਤੱਕ ਸ਼ਬਦਾਂ ਦਾ ਮਿਲ ਕੇ 'ਵਾਕ' ਨਹੀਂ ਬਣ ਜਾਂਦਾ, ਉਦੋਂ ਤੱਕ ਇਨ੍ਹਾਂ ਦਾ ਕੋਈ ਅਰਥ ਨਹੀਂ ਹੁੰਦਾ। ਸੋ ਹਮੇਸ਼ਾਂ ‘ਵਾਕ' ਤੇ ਨਿਰਭਰ ਕਰੋ । ਵਾਕ ਬਣਾਉਣ ਲਈ ਘਟੋ ਘੱਟ ਤਿੰਨ ਸ਼ਬਦਾਂ ਦੀ ਲੋੜ ਹੁੰਦੀ ਹੈ—ਤਾਂ ਹੀ ਇਸਦਾ ਕੋਈ ਅਰਥ ਹੁੰਦਾ ਹੈ।
ਪ੍ਰਸ਼ਨ-ਕੀ ਤੁਸੀਂ ਸਾਨੂੰ ਔਰਤਾਂ ਨੂੰ ਕੁਝ ਨਹੀਂ ਦੱਸੋਗੇ। ਤੁਸੀਂ ਭਾਵਨਾ-ਹੀਣ ਆਦਮੀ ਵੀ ਤਾਂ ਕੁਝ ਕੁ ਇਸ਼ਾਰੇ ਦਿੰਦੇ ਹੀ ਹੋਵੋਗੇ ਜਿਨ੍ਹਾਂ ਤੋਂ ਅਸੀਂ ਸਮਝ ਸਕੀਏ ਕਿ ਤੁਸੀਂ ਕਿਸੇ ਔਰਤ ਵਿਚ ਦਿਲਚਸਪੀ ਰੱਖਦੇ ਹੋ?
-ਠੀਕ ਹੈ। ਪਰ ਆਦਮੀਆਂ ਵਿਚ ਚਿਹਰੇ ਦੇ ਹਾਵ ਭਾਵ ਬਹੁਤ ਘੱਟ ਹੁੰਦੇ ਹਨ ਅਤੇ ਐਸੇ ਬਹੁਤੇ ਚਿੰਨ੍ਹ ਨਹੀਂ ਹਨ। ਤੁਸੀਂ ਆਪ ਹੀ ਦੇਖ ਲਵੋ ਜੇਕਰ ਤੁਸੀਂ ਕੁਝ ਹਰਕਤਾਂ ਦਾ 'ਸਮੂਹ' ਬਣਾ ਸਕਦੇ ਹੋ?
