ਹੈ ਤਾਂ ਉਹ ਤੁਹਾਨੂੰ ਮਿਲਣ ਤੋਂ ਕਤਰਾਣਾ ਸ਼ੁਰੂ ਕਰ ਦਿੰਦੇ ਹਨ। ਉਹ ਤੁਹਾਡੇ ਨਾਲ ਰਹਿਣ ਤੋਂ, ਤੁਹਾਡੇ ਕੋਲੋਂ ਮਾਲ ਖਰੀਦਣ ਤੋਂ, ਤੁਹਾਡੀ ਗੱਲ ਸੁਣਨ ਤੋਂ ਅਤੇ ਤੁਹਾਡੀ ਮਦਦ ਕਰਨ ਤੋਂ ਕਤਰਾਣ ਲੱਗ ਪੈਂਦੇ ਹਨ। ਹਮੇਸ਼ਾ ਤੋਂ ਐਸਾ ਹੀ ਹੁੰਦਾ ਆਇਆ ਹੈ ਅਤੇ ਹੁਣ ਵੀ ਐਸਾ ਹੀ ਹੈ।

ਆਕਰਸ਼ਣ ਦੇ ਵਿਸ਼ੇ ਤੇ ਪਿਛਲੇ ਦਹਾਕਿਆਂ ਵਿਚ ਕਾਫੀ ਅਧਿਐਨ ਹੋਇਆ ਹੈ। ਇਸਦਾ ਨਾਮ ਭਾਵੇਂ ਕੁਝ ਵੀ ਰੱਖ ਲਈਏ-Charm, Charisma, Liking ਜਾਂ ਕੁੱਝ ਹੋਰ, ਜਦੋਂ ਅਸੀਂ ਆਪਣਾ ਆਕਰਸ਼ਣ ਵਧਾਉਣ ਦੀ ਗੱਲ ਕਰਦੇ ਹਾਂ ਤਾਂ ਸਿੱਟਾ ਇੱਕੋ ਹੀ ਨਿਕਲਦਾ ਹੈ। ਇਸ ਦਾ ਬਸ ਇਕ ਹੀ ਰਹੱਸ ਹੈ—ਅਸੀਂ ਲੋਕਾਂ ਨੂੰ ਕੈਸਾ ਮਹਿਸੂਸ ਕਰਵਾਉਂਦੇ ਹਾਂ? ਉਨ੍ਹਾਂ ਅੰਦਰ ਕੀ ਭਾਵਨਾ ਪੈਦਾ ਕਰਦੇ ਹਾਂ?

ਪਰ ਇਸ ਦਾ ਮਤਲਬ ਕੀ ਹੈ? ਕੀ ਇਸ ਦਾ ਸਬੰਧ ਸਾਡੇ ਨਾਲ ਕੁੱਝ ਵੀ ਨਹੀਂ? ਨਹੀਂ, ਇਸ ਸਭ ਕੁਝ ਦਾ ਸਬੰਧ ਸਾਡੇ ਨਾਲ ਹੀ ਹੈ। ਤੁਹਾਨੂੰ ਆਪਣੇ ਬਾਰੇ ਚੇਤੰਨਤਾ ਪੈਦਾ ਕਰਨ ਦੀ ਲੋੜ ਹੈ, ਅਤੇ ਤੁਹਾਨੂੰ ਹੀ ਇਸ ਉੱਤੇ ਮਿਹਨਤ ਕਰਨ ਦੀ ਲੋੜ ਹੁੰਦੀ ਹੈ। ਪਰ ਇਸ ਸਾਰੀ ਮਿਹਨਤ ਦਾ ਨਤੀਜਾ ਇਹ ਹੁੰਦਾ ਹੈ ਕਿ ਲੋਕ ਤੁਹਾਡੀ ਹਾਜ਼ਰੀ ਵਿਚ ਚੰਗਾ ਚੰਗਾ ਮਹਿਸੂਸ ਕਰਦੇ ਹਨ, ਅਤੇ ਨਤੀਜੇ ਵਜੋਂ ਉਹ ਤੁਹਾਨੂੰ ਪਸੰਦ ਕਰਦੇ ਹਨ। ਮੇਰਾ ਖਿਆਲ ਹੈ ਤੁਸੀਂ ਮੇਰੀ ਗੱਲ ਸਮਝ ਹੀ ਗਏ ਹੋ।

ਤਾਂ ਫਿਰ ਅਗਲਾ ਰਹੱਸ ਕੀ ਹੈ? ਆਪਣੇ ਅੰਦਰ ਕਿਵੇਂ ਉਹ ਗੁਣ ਪੈਦਾ ਕੀਤਾ ਜਾਵੇ ਕਿ ਤੁਸੀਂ 'ਆਕਰਸ਼ਕ' ਹੋ ਜਾਉ? ਮੁੱਖ ਤੌਰ ਤੇ ਇਹ ਸਰੀਰਕ ਭਾਸ਼ਾ ਨਾਲ ਹੀ ਹੁੰਦਾ ਹੈ।

ਇਨ੍ਹਾਂ ਖੋਜਾਂ ਵਿਚੋਂ ਜੋ ਸਾਂਝੀਆਂ ਚੀਜ਼ਾਂ ਨਿਕਲਦੀਆਂ ਹਨ, ਅਸੀਂ ਉਨ੍ਹਾਂ ਤੇ ਵੀ ਨਜ਼ਰ ਮਾਰ ਲਈਏ। ਇਨ੍ਹਾਂ ਵਿਚੋਂ ਸਭ ਤੋਂ ਉਪਰ ਦਿੱਖ (Appearance) ਆਉਂਦੀ ਹੈ। ਦਿੱਖ ਵਿਚ ਦੋ ਚੀਜ਼ਾਂ ਆਉਂਦੀਆਂ ਹਨ-ਪਹਿਰਾਵਾ ਅਤੇ ਇਹ ਕਿ ਤੁਸੀਂ ਤਿਆਰ ਕਿਵੇਂ ਹੋਏ ਹੋ।

"ਅੱਜ ਮੇਰੀ ਦਿੱਖ ਠੀਕ ਠਾਕ ਹੈ—ਮੈਂ ਟੈਲੀਵੀਜ਼ਨ ਤੇ ਆਉਣ ਲਈ ਤਿਆਰ ਹੋਈ ਸੀ। ਪਰ ਆਮ ਤੌਰ ਤੇ ਮੇਰੀ ਹਾਲਤ ਐਸੀ ਹੁੰਦੀ ਹੈ ਜਿਵੇਂ ਮੇਰੀ ਗੱਡੀ ਲਾਈਨ ਤੋਂ ਉਤਰ ਗਈ ਹੋਵੇ ਅਤੇ ਮੈਂ ਗੋਡੇ ਘਿਸਰ ਕੇ ਬਾਹਰ ਨਿੱਕਲੀ ਹੋਵਾਂ।"

-ਵਿਕਟੋਰੀਆ ਵੁੱਡ 

ਦਿੱਖ

ਲੋਕ ਕਹਿੰਦੇ ਹਨ ਕਿ ਜਦੋਂ ਤੁਸੀਂ ਕਿਸੇ ਨੂੰ ਮਿਲਦੇ ਹੋ ਤਾਂ ਸਭ ਤੋਂ ਪਹਿਲੇ ਤੁਸੀਂ ਉਸਦਾ ਪਹਿਰਾਵਾ ਦੇਖਦੇ ਹੋ ਅਤੇ ਫਿਰ ਆਪਣੇ ਅਰਧ-ਚੇਤ ਮਨ ਵਿਚ ਉਸ ਦੀ ਪੂਰੀ ਸਰੀਰਕ ਖਿੱਚ ਵੱਲ ਧਿਆਨ ਦੇਂਦੇ ਹੋ। ਸਰੀਰਕ ਖਿੱਚ ਦੇ ਮਨੋਵਿਗਿਆਨ ਬਾਰੇ ਬਹੁਤ ਕੁਝ ਅਧਿਐਨ ਕੀਤਾ ਅਤੇ ਲਿਖਿਆ ਜਾ ਚੁੱਕਾ ਹੈ। ਪਰ ਆਪਾਂ ਕੁਝ ਕੁ ਉਨ੍ਹਾਂ ਚੀਜ਼ਾਂ ਦੀ ਹੀ ਗੱਲ ਕਰੀਏ ਜਿਹੜੀਆਂ ਸਪਸ਼ਟ ਹੀ ਹਨ।

“ਪਹਿਲਾ ਪ੍ਰਭਾਵ ਇਕ ਛਿਣ ਵਿਚ ਹੀ ਬਣ ਜਾਂਦਾ ਹੈ।”