ਮੁਸਕਰਾਹਟ ਨੂੰ ਸੁਭਾਵਕ ਬਣਾਉ

ਸਿਰਫ ਉਦੋਂ ਮੁਸਕਰਾਉ ਜਦੋਂ ਮੁਸਕਰਾਣਾ ਕੁਦਰਤੀ ਜਾਂ ਸੁਭਾਵਕ ਹੋਵੇ। ਇਹ ਵੀ ਧਿਆਨ ਰੱਖੋ ਕਿ ਇਹ ਤੁਹਾਡੇ ਸ਼ਬਦਾਂ ਨਾਲ ਢੁਕਦੀ ਹੋਵੇ ਅਤੇ ਉਸ ਵਕਤ ਹੋ ਰਹੀਆਂ ਘਟਨਾਵਾਂ ਤੋਂ ਵਿਪਰੀਤ ਨਾ ਹੋਵੇ। ਕੀ ਕਦੇ ਐਸਾ ਹੋਇਆ ਹੈ ਕਿ ਤੁਸੀਂ ਕਿਸੇ ਮਿੱਤਰ, ਜਾਣਕਾਰ, ਅਫਸਰ/ਬੌਸ, ਸਾਥੀ ਕੰਮ ਕਰਨ ਵਾਲੇ, ਗਾਹਕ ਜਾਂ ਕਿਸੇ ਹੋਰ ਤੋਂ ਕੁਝ ਮੰਗਿਆ ਹੋਵੇ ਅਤੇ ਉਸ ਨੇ ਆਪਣੀ ਨਾਂਹ ਦੀ ਮਾੜੀ ਖਬਰ ਇਕ ਵੱਡੀ ਸਾਰੀ ਮੁਸਕਾਨ ਨਾਲ ਦਿੱਤੀ ਹੋਵੇ (ਅਤੇ ਹੁਣ ਤੁਸੀਂ ਅੰਦਾਜ਼ਾ ਲਗਾ ਲਵੋਗੇ ਕਿ ਇਹ ਮੁਸਕਾਨ ਅਸਲੀ ਨਹੀਂ ਸੀ) ਤਾਂ ਉਸ ਦਾ ਐਸਾ ਕਰਨਾ ਤੁਹਾਨੂੰ ਕੀ ਸੁਨੇਹਾ ਦਿੰਦਾ ਹੈ?

ਸਭ ਤੋਂ ਪਹਿਲਾਂ, ਇਨ੍ਹਾਂ ਦੋਹਾਂ ਚੀਜ਼ਾਂ ਵਿਚ ਮੇਲ ਨਹੀਂ ਸੀ। ਤੁਸੀਂ ਇਹ ਨਹੀਂ ਮੰਨ ਸਕਦੇ ਕਿ ਉਸਦੀ ਮੁਸਕਰਾਹਟ ਕਿਸੇ ਅਸਲੀ ਭਾਵਨਾ ਨੂੰ ਪ੍ਰਗਟ ਕਰਦੀ ਸੀ ਕਿਉਂਕਿ ਕਿਸੇ ਨੂੰ ਕੋਈ ਚੀਜ਼ ਨਾ ਦੇ ਸਕਣ ਦੇ ਅਫਸੋਸ ਨਾਲ ਇਹ ਮੇਲ ਨਹੀਂ ਖਾਂਦੀ । (ਅਸੀ ਕਿਸੇ ਨੂੰ ਮਾੜੀ ਖਬਰ ਦੇਣ ਲੱਗਿਆਂ ਮੁਸਕਰਾਉਂਦੇ ਨਹੀਂ) ਤੁਸੀਂ ਇਹੀ ਸੋਚੋਗੇ ਕਿ ਉਸ ਦੀ ਤੁਹਾਡੀ ਗਲ ਮੰਨਣ ਦੀ ਕਦੇ ਵੀ ਇੱਛਾ ਨਹੀਂ ਸੀ, ਜਾਂ ਇਹ ਕਹਿ ਲਉ ਕਿ ਉਸ ਨੇ ਤੁਹਾਡੀ ਗਲ ਮੰਨਣ ਬਾਰੇ ਸੋਚਿਆ ਤੱਕ ਨਹੀਂ ਸੀ। ਇਹ ਮੁਸਕਰਾਹਟ ਇਕ ਵੈਰ ਵਿਰੋਧ ਦੀ ਭਾਵਨਾ ਨੂੰ ਛੁਪਾਣ ਲਈ ਵੀ ਆਈ ਹੋ ਸਕਦੀ ਹੈ।

ਦੂਸਰੇ, ਇਹ ਧੋਖੇ ਵਾਲੀ ਗੱਲ ਖਿਝਾ ਦਿੰਦੀ ਹੈ। ਚਿਹਰੇ ਤੇ ਨਾ ਖੁਸ਼ੀ ਤੇ ਨਾ ਅਫਸੋਸ ਦਾ ਭਾਵ ਅਤੇ ਕਿਸੇ ਵੇਲੇ ਆ ਰਹੀ ਹਲਕੀ ਜਿਹੀ ਮੁਸਕਰਾਹਟ, ਜਿਹੜੀ ਗੱਲ ਕਰਦਿਆਂ ਕਿਸੇ ਖਾਸ ਨੁਕਤੇ ਨਾਲ ਸਬੰਧ ਰੱਖਦੀ ਹੋਵੇ, ਐਸੀ ਗੱਲ ਵਿਚ ਕੁਝ ਈਮਾਨਦਾਰੀ ਪਰਗਟ ਹੁੰਦੀ ਹੈ। ਦੂਜੇ ਸ਼ਬਦਾਂ ਵਿਚ ਅਸੀਂ ਇਹ ਮੰਨ ਸਕਦੇ ਹਾਂ ਕਿ ਉਸਨੇ ਠੀਕ ਜਾਂ ਗਲਤ, ਪਰ ਸੋਚ ਸਮਝ ਕੇ ਇਹੀ ਫੈਸਲਾ ਕੀਤਾ ਹੈ ਕਿ ਉਹ ਤੁਹਾਡੀ ਗਲ ਨਹੀਂ ਮੰਨ ਸਕਦਾ। ਘੱਟੋ ਘੱਟ ਉਸ ਨੇ ਤੁਹਾਡੀ ਗੱਲ ਤਾਂ ਸਮਝੀ।

ਜੇ ਤੁਸੀਂ ਵੀ ਐਸਾ ਹੀ ਕਰਦੇ ਹੋ ਤਾਂ ਇਹ ਸਮਝਣ ਦੀ ਲੋੜ ਹੈ ਕਿ ਹੋ ਸਕਦਾ ਹੈ ਸਰੀਰਕ ਭਾਸ਼ਾ ਵਿਚ ਤੁਸੀਂ ਬੇਮੇਲ ਤੇ ਅਣਢੁਕਵੇਂ ਇਸ਼ਾਰੇ ਕਰ ਰਹੇ ਹੋ ਜਿਨ੍ਹਾਂ ਨਾਲ ਤੁਹਾਡੀ ਕਹੀ ਹੋਈ ਗਲ ਦਾ ਅਸਰ ਘੱਟ ਜਾਂਦਾ ਹੈ। ਇਹ ਵੀ ਹੋ ਸਕਦਾ ਹੈ ਕਿ ਤੁਸੀਂ ਦੂਸਰੇ ਵਿਅਕਤੀ ਨੂੰ ਖਿਝਾ ਰਹੇ ਹੋਵੋ ਅਤੇ ਭੰਬਲ ਭੂਸੇ ਵਿਚ ਪਾ ਰਹੇ ਹੋਵੋ। ਇਸ ਨਾਲ ਤੁਸੀਂ ਆਪਣਾ ਵਿਸ਼ਵਾਸ ਗੁਆ ਬੈਠੋਗੇ। ਜੇ ਤੁਹਾਡੇ ਭਾਵ ਤੇ ਹਰਕਤਾਂ ਤੁਹਾਡੇ ਸ਼ਬਦਾਂ ਨਾਲ, ਅਤੇ ਬਾਕੀ ਸਰੀਰ ਦੀ ਭਾਸ਼ਾ ਨਾਲ ਢੁਕਵੇਂ ਨਹੀਂ ਤਾਂ ਲੋਕਾਂ ਦੀਆਂ ਨਜ਼ਰਾਂ ਵਿਚ ਤੁਹਾਡਾ ਅਕਸ ਖਰਾਬ ਹੋ ਜਾਵੇਗਾ।