ਸੋ ਜੇਕਰ ਤੁਸੀਂ ਬਾਕੀ ਸਭ ਕੁੱਝ ਸਹੀ ਕਰ ਰਹੇ ਹੋ, ਪਰ ਤੁਹਾਨੂੰ ਇਹ ਸਮਝ ਨਹੀਂ ਲੱਗ ਰਹੀ ਕਿ ਤੁਸੀਂ ਕਿੱਥੇ ਗਲਤੀ ਕਰ ਰਹੇ ਹੋ, ਤਾਂ ਤੁਹਾਨੂੰ ਆਪਣੀ ਗੱਲ ਦੇ ਸ਼ਬਦਾਂ ਤੋਂ ਇਲਾਵਾ ਪੱਖਾਂ (ਜਿਨ੍ਹਾਂ ਦੀ ਅਸੀਂ ਗੱਲ ਕੀਤੀ ਹੈ) ਵਲ ਧਿਆਨ ਦੇਣ ਦੀ ਲੋੜ ਹੈ।

ਚੰਗੀ ਆਵਾਜ਼ ਦਾ ਨੁਸਖਾ

ਸ਼ੈਫੀਲਡ ਯੂਨੀਵਰਸਿਟੀ ਦੇ ਭਾਸ਼ਾ ਵਿਗਿਆਨ ਵਿਭਾਗ ਵਿਚ ਹੋਈ ਖੋਜ ਦੇ ਆਧਾਰ ਤੇ ਇਕ ਲੇਖ ਛਪਿਆ ਜਿਸ ਦਾ ਨਾਮ ਸੀ 'ਚੰਗੀ ਆਵਾਜ਼ ਦਾ ਨੁਸਖਾ’। ਇਸ ਵਿਚ ਕਈ ਦਿਲਚਸਪ ਗੱਲਾਂ ਬਾਰੇ ਦੱਸਿਆ ਗਿਆ ਸੀ। ਖੋਜ ਕਰਨ ਵਾਲੇ ਮਰਦਾਂ ਤੇ ਔਰਤਾਂ ਦੀਆਂ ਆਦਰਸ਼ਕ ਆਵਾਜ਼ਾਂ ਲਈ ਕੋਈ ਨੁਸਖਾ ਜਾਂ ਫਾਰਮੂਲਾ ਲੱਭਣ ਦੀ ਕੋਸ਼ਿਸ਼ ਕਰ ਰਹੇ ਸਨ। ਇਸ ਫਾਰਮੂਲੇ ਵਿਚ ਸੁਰ, ਰਫਤਾਰ, ਪ੍ਰਤੀ ਮਿੰਟ ਸ਼ਬਦ, ਆਵਾਜ਼ ਉੱਚੀ ਜਾਂ ਨੀਵੀਂ ਅਤੇ ਗਲ ਕਰਨ ਦੇ ਢੰਗ ਨੂੰ ਮੁੱਖ ਰੱਖਿਆ ਗਿਆ ਸੀ। ਜਿਹੜੀਆਂ ਆਵਾਜ਼ਾਂ ਆਦਰਸ਼ਕ ਆਵਾਜ਼ਾਂ ਵਜੋਂ ਬਹੁਤ ਵਧੀਆ ਗਿਣੀਆਂ ਗਈਆਂ, ਖੋਜੀਆਂ ਤੇ ਆਵਾਜ਼ ਦੇ ਇੰਜੀਨੀਅਰਾਂ ਨੇ ਉਨ੍ਹਾਂ ਦਾ ਅਧਿਐਨ ਕਰ ਕੇ ਇਕ ਸਮੀਕਰਨ ਬਣਾਇਆ ਕਿ ਕਿਸ ਗੁਣ ਨੂੰ ਕਿੰਨਾ ਹੋਣਾ ਚਾਹੀਦਾ ਹੈ ਤਾਂ ਕਿ ਆਵਾਜ਼ ਆਦਰਸ਼ਕ ਹੋਵੇ।

ਉਨ੍ਹਾਂ ਦਾ ਵਿਚਾਰ ਸੀ ਕਿ ਇਕ ਆਦਰਸ਼ਕ ਆਵਾਜ਼ ਵਾਲਾ ਵਿਅਕਤੀ ਪ੍ਰਤੀ ਮਿੰਟ 164 ਤੋਂ ਜ਼ਿਆਦਾ ਸ਼ਬਦ ਨਹੀਂ ਬੋਲਣਾ ਚਾਹੀਦਾ ਅਤੇ ਉਸਨੂੰ ਦੋ ਵਾਕਾਂ ਦੇ ਵਿਚਕਾਰ 0.48 ਸਕਿੰਟ ਲਈ ਰੁਕਣਾ ਚਾਹੀਦਾ ਹੈ। ਨਤੀਜਾ ਸਮਝੋ ਕਿ ਇਕ ਮਿਸ਼ਰਣ ਹੈ ਜਿਸ ਵਿਚ ਡੇਮ ਜੂਡੀ ਡੈਂਚ, ਮਾਰੀਅਲਾ ਫਰੌਸਟਰਪ ਅਤੇ ਹੋਨਰ ਬਲੈਕਮੈਨ ਨੂੰ ਮਿਲਾ ਕੇ ਆਦਰਸ਼ਕ ਇਸਤ੍ਰੀ ਆਵਾਜ਼ ਬਣੇਗੀ। ਡੇਮ ਜੂਡੀ 160 ਸ਼ਬਦ ਪ੍ਰਤੀ ਮਿੰਟ ਬੋਲਦੀ ਹੈ ਅਤੇ 0.5 ਸਕਿੰਟ ਲਈ ਵਾਕਾਂ ਵਿਚਕਾਰ ਰੁਕਦੀ ਹੈ, ਮਾਰੀਅਲਾ ਔਸਤਨ 180 ਸ਼ਬਦ ਪ੍ਰਤੀ ਮਿੰਟ ਬੋਲਦੀ ਹੈ ਤੇ ਵਾਕਾਂ ਵਿਚ 0.5 ਸਕਿੰਟ ਲਈ ਰੁਕਦੀ ਹੈ ਅਤੇ ਹੋਮਰ ਬਲੈਕਮੈਨ ਥੋੜ੍ਹਾ ਆਰਾਮ ਨਾਲ 120 ਸ਼ਬਦ ਪ੍ਰਤੀ ਮਿੰਟ ਬੋਲਦੀ ਹੈ।

ਆਦਮੀਆਂ ਵਿਚ ਸਭ ਤੋਂ ਆਕਰਸ਼ਕ ਆਵਾਜ਼ ਐਲਨ ਰਿਕਮੈਨ, ਜੈਰੇਮੀ ਆਇਰਨਜ਼ ਤੇ ਮਾਈਕਲ ਗੈਂਬਨ ਦੀ ਆਵਾਜ਼ ਦਾ ਮਿਸ਼ਰਨ ਮੰਨੀ ਗਈ ਜੈਰੇਮੀ 200 ਸ਼ਬਦ ਪ੍ਰਤੀ ਮਿੰਟ, ਐਲਨ 180 ਅਤੇ ਮਾਈਕਲ 160 ਸ਼ਬਦ ਪ੍ਰਤੀ ਮਿੰਟ ਬੋਲਦੇ ਹਨ।

ਖੋਜੀਆਂ ਨੇ ਇਹ ਵੀ ਦੇਖਿਆ ਕਿ ਆਵਾਜ਼ ਦੇ ਉਹ ਗੁਣ ਜਿਨ੍ਹਾਂ ਨੂੰ ਵਿਸ਼ਵਾਸ ਤੇ ਭਰੋਸੇ ਨਾਲ ਸਬੰਧਤ ਕੀਤਾ ਜਾਂਦਾ ਹੈ, ਉਹ ਸਕਾਰਾਤਮਕ ਮੰਨੇ ਗਏ ਅਤੇ ਇਨ੍ਹਾਂ ਨਾਲ ਹੀ ਕੋਈ ਆਵਾਜ਼ ਆਦਰਸ਼ਕ ਬਣਦੀ ਹੈ।

ਜਿਵੇਂ ਕਿ ਅਸੀਂ ਪਹਿਲਾਂ ਕਿਹਾ ਸੀ, ਸਿਰਫ ਸ਼ਬਦ ਹੀ ਮਹੱਤਵਪੂਰਨ ਨਹੀਂ, ਸਗੋਂ ਬਿਨਾਂ ਸ਼ਬਦਾਂ ਦੀ ਭਾਸ਼ਾ, ਪ੍ਰਾ-ਭਾਸ਼ਾ ਵੀ ਬਹੁਤ ਮਹੱਤਵਪੂਰਨ ਹੈ।