ਅਪ੍ਰਵਾਨਗੀ ਜਾਂ ਅਸਹਿਮਤੀ?

ਕਈ ਵਾਰੀ ਤੁਸੀਂ ਕਿਸੇ ਵਿਅਕਤੀ ਨੂੰ ਆਪਣੇ ਹੱਥ ਦੀਆਂ ਉਂਗਲਾਂ ਨਾਲ ਮੂੰਹ ਨੂੰ ਢੱਕ ਕੇ ਅੰਗੂਠੇ ਨੂੰ ਗੱਲ੍ਹ ਨਾਲ ਲਗਾਏ ਹੋਏ ਦੇਖੋਗੇ। ਆਮ ਤੌਰ ਤੇ ਇਸ ਤੋਂ ਇਹੀ ਇਸ਼ਾਰਾ ਮਿਲਦਾ ਹੈ ਕਿ ਉਹ ਵਿਅਕਤੀ ਤੁਹਾਡੀ ਕਹੀ ਹੋਈ ਗੱਲ ਨਾਲ ਸਹਿਮਤ ਨਹੀਂ ਜਾਂ ਉਹ ਇਹ ਸਮਝਦਾ ਹੈ ਕਿ ਤੁਸੀਂ ਸੱਚ ਨਹੀਂ ਬੋਲ ਰਹੇ। ਅਚੇਤ ਹੀ ਹੱਥ ਮੂੰਹ ਵੱਲ ਚਲਾ ਜਾਂਦਾ ਹੈ। ਹੱਥ ਮੂੰਹ ਵਲ ਜਾਣ ਦਾ ਕੀ ਮਤਲਬ ਹੈ? ਇਸ ਤਰ੍ਹਾਂ ਸਮਝ ਲਵੋ ਕਿ ਸਾਡਾ ਦਿਮਾਗ ਸ਼ਾਇਦ ਸਾਡੇ ਮੂੰਹ ਤੋਂ ਇਹ ਗੱਲ ਨਿਕਲਣ ਤੋਂ ਰੋਕਣਾ ਚਾਹੁੰਦਾ ਹੈ ਕਿ "ਮੈਂ ਤੁਹਾਡੇ ਨਾਲ ਸਹਿਮਤ ਨਹੀਂ ਜਾਂ ਤੁਸੀਂ ਝੂਠ ਬੋਲ ਰਹੇ ਹੋ ਜਾਂ ਇਹ ਗੱਲ ਮੰਨੀ ਨਹੀਂ ਜਾ ਸਕਦੀ।” ਜੇ ਤੁਸੀਂ ਸਟੇਜ ਤੋਂ ਬੋਲ ਰਹੇ ਹੋਵੋ ਅਤੇ ਤੁਹਾਨੂੰ ਸਰੋਤਿਆਂ ਵਿਚ ਕੁਝ ਕੁ ਵਿਅਕਤੀ ਐਸਾ ਕਰਦੇ ਹੋਏ ਦਿੱਖਣ, ਜਾਂ ਇਕ ਅੱਧ ਹੀ ਐਸਾ ਕਰਦਾ ਹੋਇਆ ਦਿੱਸੇ ਤਾਂ ਇੱਧਰ ਧਿਆਨ ਜ਼ਰੂਰ ਦਿਉ। ਵਿਸ਼ਾ ਬਦਲ ਲਉ। ਗੱਲ ਦੀ ਤਹਿ ਤੱਕ ਪਹੁੰਚਣ ਦਾ ਜਤਨ ਕਰੋ। ਹੋਰ ਹਰਕਤਾਂ ਵਿਚੋਂ ਸਮਝਣ ਦੀ ਕੋਸ਼ਿਸ਼ ਕਰੋ ਕਿ ਔਕੜ ਕੀ ਹੈ।

ਸਿਆਣੀ ਗੱਲ

ਪੈਰ ਅਤੇ ਲੱਤਾਂ ਸਾਡੇ ਸਰੀਰ ਦੇ ਸਭ ਤੋਂ ਇਮਾਨਦਾਰ ਹਿੱਸੇ ਹਨ।