ਇਕ ਖੋਜ ਕਰਨ ਵਾਲੇ ਨੇ ਇੰਗਲੈਂਡ ਦੀ ਲੇਬਰ ਪਾਰਟੀ ਕਾਨਫਰੰਸ ਵਿਚ ਜਦੋਂ ਟੋਨੀ ਬਲੇਅਰ ਬੋਲ ਰਿਹਾ ਸੀ ਤਾਂ ਉਸ ਵੇਲੇ ਦੇ ਚਾਂਸਲਰ ਜਾਰਡਨ ਬਰਾਊਨ (ਜੋ ਬਿਲਕੁਲ ਉਸ ਦੇ ਨਾਲ ਬੈਠਾ ਸੀ) ਦੀਆਂ ਹਰਕਤਾਂ ਨੋਟ ਕੀਤੀਆਂ। ਉਹ ਇਹ 'ਬਦਲਵੀਆਂ ਹਰਕਤਾਂ' ਕਰ ਰਿਹਾ ਸੀ: ਉਸਨੇ ਕਪੜੇ 25 ਵਾਰੀ ਸਵਾਰੇ, ਬੁਲ੍ਹ 12 ਵਾਰੀ ਟੁੱਕੇ, 35 ਵਾਰੀ ਹੱਥ ਚਿਹਰੇ ਵੱਲ ਲਿਜਾਣ ਦੀ ਹਰਕਤ ਕੀਤੀ, ਆਪਣੇ ਕੱਫ 29 ਵਾਰੀ ਛੇੜੇ, 36 ਵਾਰੀ ਆਪਣੀਆਂ ਬਾਹਵਾਂ ਮੋੜੀਆਂ ਅਤੇ ਖੋਲ੍ਹੀਆਂ, ਅਤੇ ਬਲੇਅਰ ਵਲੋਂ 155 ਵਾਰੀ ਨਜ਼ਰ ਹਟਾਈ।

ਮੇਰਾ ਖਿਆਲ ਹੈ ਕਿ ਮੇਰੇ ਵਾਂਗ ਤੁਸੀਂ ਵੀ 'ਗਿਨੇਸ ਬੁਕ ਆਫ ਵਰਲਡ ਰਿਕਾਰਡਜ' ਬਾਰੇ ਸੋਚ ਰਹੇ ਹੋਵੋਗੇ।

ਮੇਰੀ ਰਾਇ ਵਿਚ ਉਸ ਦੀਆਂ ਹਰਕਤਾਂ ਵਿਚੋਂ ਨਕਾਰਾਤਮਕ ਲੀਕੇਜ ਉਭਰ ਕੇ ਆ ਰਹੀ ਹੈ। ਅਤੇ ਹਾਂ, ਹਾਲੇ ਅਸੀਂ ਉਸ ਦੀਆਂ ਲੱਤਾਂ-ਪੈਰ-ਸਰੀਰ ਦੇ ਹੇਠਲੇ ਹਿੱਸੇ ਵੱਲ ਨਹੀਂ ਦੇਖਿਆ। ਉੱਥੇ ਹੋਰ ਵੀ ਬਹੁਤ ਕੁੱਝ ਹੋ ਰਿਹਾ ਹੋਣਾ ਹੈ। ਕੀ ਖਿਆਲ ਹੈ? ਮੇਰਾ ਖਿਆਲ ਹੈ ਉਹ ਉੱਥੇ ਬੈਠਣਾ ਹੀ ਨਹੀਂ ਸੀ ਚਾਹੁੰਦਾ।

ਲੀਕੇਜ ਅਤੇ ID 10T ਵਾਲੀਆਂ ਗਲਤੀਆਂ ਦਾ ਸਾਰ

ਅਸੀਂ ਆਪਣੇ 7 ਅਧਿਆਇ ਪੂਰੇ ਕਰਨ ਹੀ ਵਾਲੇ ਹਾਂ ਅਤੇ ਮੈਂ ਤੁਹਾਡੇ ਯਾਦ ਰੱਖਣ ਲਈ ਕੁਝ ਕੁ ਹਰਕਤਾਂ ਦਾ ਜ਼ਿਕਰ ਕਰਨਾ ਚਾਹੁੰਦਾ ਹਾਂ ਜਿਹੜੀਆਂ 'ਬੇਆਰਾਮੀ' ਸਾਬਤ ਕਰਦੀਆਂ ਹਨ। ਦੂਜੇ ਸ਼ਬਦਾਂ ਵਿਚ ਇਹ ਸਾਰੀਆਂ 'ਲੀਕੇਜ' ਵਾਲੀਆਂ ਹਰਕਤਾਂ ਹਨ।

ਹਮੇਸ਼ਾ ਯਾਦ ਰੱਖੋ ਕਿ ਹੇਠਾਂ ਦਿੱਤੀਆਂ ਹਰਕਤਾਂ ਵਿਚੋਂ ਕੋਈ ਹਰਕਤ ਆਪਣੇ ਆਪ ਵਿਚ ਕੋਈ ਵੀ ਗੱਲ ਪੱਕੀ ਨਹੀਂ ਦੱਸ ਸਕਦੀ। ਪਰ ਕੁਝ ਕੁ ਹਰਕਤਾਂ ਮਿਲ ਕੇ-ਤਿੰਨ ਜਾਂ ਵੱਧ, ਤੁਹਾਨੂੰ ਸਹੀ ਨਤੀਜੇ ਤੇ ਪਹੁੰਚਾ ਸਕਦੀਆਂ ਹਨ। ਨਹੀਂ ਤੇ ਤੁਸੀਂ ID 10T ਵਾਲੀ ਗਲਤੀ ਕਰ ਰਹੇ ਹੋਵੋਗੇ।

ਕਿਸ ਹਰਕਤ ਦਾ ਕੀ ਮਤਲਬ ਹੈ, ਇਹ ਮੈਂ ਹੁਣ ਦੁਬਾਰਾ ਨਹੀਂ ਦੱਸਾਂਗਾ। ਮੈਨੂੰ ਯਕੀਨ ਹੈ ਕਿ ਤੁਸੀਂ ਇਨ੍ਹਾਂ ਨੂੰ ਹੁਣ ਤੱਕ ਤਾਂ ਆਸਾਨੀ ਨਾਲ ਪਹਿਚਾਣਨ ਲਗ ਪਏ ਹੋਵੋਗੇ:

• ਸਰੀਰ ਆਪਣੇ ਉਪਰ ਹੀ ਬੰਦ ਕੀਤਾ (ਸੰਕੋਚਿਆ) ਹੋਇਆ।
• ਸਰੀਰ ਜਾਂ ਮੋਢਿਆਂ ਦੀ ਦਿਸ਼ਾ ਦੂਜੇ ਵਿਅਕਤੀ ਤੋਂ ਉਲਟੀ ਦਿਸ਼ਾ ਵਿਚ।
• ਬਾਹਵਾਂ ਮੋੜੀਆਂ ਹੋਈਆਂ ਅਤੇ ਮੁੱਕੀਆਂ ਵੱਟੀਆਂ ਹੋਈਆਂ।
• ਬਾਹਵਾਂ ਮੋੜੀਆਂ ਹੋਈਆਂ ਅਤੇ ਬਾਹਵਾਂ ਦਾ ਉਪਰਲਾ ਹਿੱਸਾ ਘੁੱਟ ਕੇ ਪਕੜਿਆ ਹੋਇਆ।
• ਹੱਥ ਮਲਣੇ।
• ਮੋਢੇ ਉਤਾਂਹ ਨੂੰ ਚੁੱਕੇ ਹੋਏ (ਕੰਨਾਂ ਵੱਲ ਨੂੰ)