ਭਾਲ ਸਾਰੀ ਗਈ ਐਵੇਂ

ਧਰਤੀ ਤੇ ਮਿਲੇ ਨਾਹੀਂ,

ਪੌਣ ਮੋਢੇ ਚੜ੍ਹੀ ਫੇਰ

ਢੂੰਡਣ ਸਿਰ ਚਾ ਲਿਆ॥੨॥

 

ਦੇਸ਼ ਦੇਸ਼, ਦੁਆਰ ਦੁਆਰ,

ਖੰਡ ਖੰਡ, ਗਲੀ, ਕੂਚੇ,

ਉੱਚੀ ਉੱਚੀ ਉੱਡ ਉੱਡ

ਨੀਝ ਲਾ ਤਕਾ ਲਿਆ ।

 

ਹੰਢ ਹੰਢ, ਉੱਡ ਉੱਡ,

ਲੱਭ ਲੱਭ ਸਾਰੇ ਥਾਉਂ,

ਨਿਖੁੱਟੀ ਨੇ ਹਿਮਾਲੇ ਦਾ

ਆ ਆਸਰਾ ਤਕਾ ਲਿਆ।

 

ਪੌਣ ਦਾ ਸਰੂਪ ਛੱਡ

ਪਾਣੀ ਵਾਲੇ ਰੂਪ ਆਈ,

ਫੇਰ ਉਸੇ ਜੱਗ ਵਿਚ

ਢੂੰਡਣ ਸਿਰ ਚਾ ਲਿਆ ।

 

ਉਹਨੀਂ ਉਹਨੀਂ ਰਾਹੀਂ ਆਈ,

ਠੰਢੀ ਠਾਰ ਨਵੀਂ ਨਵੀਂ,

ਨਵਾਂ ਓਹੋ ਰੂਪ ਧਾਰ

ਨਵੇਂ ਸਿਰੇ ਭਾਲਿਆ ॥੩॥

 

ਭਾਲਦੀ ਪਹਾੜ ਘਾਟੀ

"ਪਾਉਂਟੇ" ਮੈਂ ਫੇਰ ਆਈ,

ਤੱਕ ਸਾਰੀ ਲਾਂਭ

ਸੁਹਣੇ ਨੂੰ ਸੰਭਾਲਿਆ !

 

ਉਤਾਵਲੀ ਸੰਭਾਲਦੀ ਮੈਂ

ਭਾਲਦੀ ਤੇ ਪੁੱਛਦੀ ਨੂੰ

ਮਿਲੇ ਨਹੀਂ ਕਿਸੇ ਥਾਉਂ

ਰੂਪ ਨਾ ਦਿਖਾਲਿਆ।