ਇਕਨਾ ਕੋਲ ਹੁਸਨ ਚਤੁਰਾਈ

ਇਕਨਾ ਕੋਲ ਹੁਸਨ ਚਤੁਰਾਈ, ਇਕ ਘਾਇਲ ਯਾਰ ਦੀਵਾਨੇ ।

ਇਕਨਾ ਪਾਸ ਕੂਤ ਨਾ ਸ਼ਬ ਦਾ, ਇਕ ਬਖਸ਼ਣ ਰੋਜ਼ ਖ਼ਜ਼ਾਨੇ ।

ਇਕਨਾ ਦਰਦ ਹਮੇਸ਼ਾ ਆਹੀਂ, ਇਕ ਗਾਵਣ ਨਾਲ ਤਰਾਨੇ ।

ਹਾਸ਼ਮ ਖ਼ੁਆਬ ਚਮਨ ਦੀ ਲਹਿਰੀਂ, ਗਏ ਫਿਰ ਫਿਰ ਕਈ ਜ਼ਮਾਨੇ ।1

 

ਇਕਨਾ ਰੋਗ ਸਰੀਰਾਂ ਉਪਜੇ

ਇਕਨਾ ਰੋਗ ਸਰੀਰਾਂ ਉਪਜੇ, ਇਕ ਦਿਲ ਦੇ ਵਹਿਮ ਅਜ਼ਾਰੀ ।

ਵਹਿਮ ਖ਼ਿਆਲ ਦਲੀਲਾਂ ਕੀਤਾ, ਉਹਨੂੰ ਕਾਮਲ ਰੋਗ ਬੀਮਾਰੀ ।

ਜੋ ਦਿਲ ਗ਼ਰਕ ਦਲੀਲੀਂ ਹੋਇਆ, ਉਹਨੂੰ ਸਾਸ ਨਿਬਾਹੁਣ ਭਾਰੀ ।

ਹਾਸ਼ਮ ਦਿਲ ਬੇਦਰਦ ਵਟਾਏ, ਕੋਈ ਗਾਹਕ ਮਿਲੇ ਬਿਆਪਾਰੀ ।1

 

ਇਕ ਪਲ ਹਿਜਰ ਨਹੀਂ ਸਹਿ ਸਕਦਾ

ਇਕ ਪਲ ਹਿਜਰ ਨਹੀਂ ਸਹਿ ਸਕਦਾ, ਤਿਸ ਆਵੇ ਪੇਸ਼ ਜੁਦਾਈ ।

ਦਿਲ ਨੂੰ ਸਬਰ ਅਰਾਮ ਨ ਆਵੇ, ਦੂਜਾ ਦੁਰ ਦੁਰ ਕਰੇ ਲੁਕਾਈ ।

ਦਿਲ ਨੂੰ ਸਿਕਲ ਹੋਵੇ ਹਰ ਤਰਫ਼ੋਂ, ਤਦ ਪਕੜੇ ਐਨ ਸਫ਼ਾਈ ।

ਤਾਂ ਕੁਝ ਬਣੇ ਆਈਨਾ ਹਾਸ਼ਮ, ਅਤੇ ਸਮਝੇ ਭੇਤ ਇਲਾਹੀ ।1

 

ਇਕਸੇ ਤਾਰ ਬਹਾਰ ਨਾ ਰਹਿੰਦੀ

ਇਕਸੇ ਤਾਰ ਬਹਾਰ ਨਾ ਰਹਿੰਦੀ, ਨਹੀਂ ਇਕਸੇ ਤੌਰ ਜ਼ਮਾਨਾ ।

ਹਰ ਦਿਨ ਚਾਲ ਨਹੀਂ ਅਲਬੇਲੀ, ਨਹੀਂ ਹਰ ਦਮ ਜ਼ੋਰ ਜਵਾਨਾ ।

ਰੋਵਣ ਸੋਗ ਹਮੇਸ਼ ਨਾ ਹੋਵੇ, ਨਹੀਂ ਨਿੱਤ ਨਿੱਤ ਰਾਗ ਸ਼ਹਾਨਾ ।

ਹਾਸ਼ਮ ਬੈਠ ਗਈਆਂ ਲੱਖ ਡਾਰਾਂ, ਇਹ ਜਗਤ ਮੁਸਾਫ਼ਰਖਾਨਾ ।