ਰੋਵਣ ਨੈਣ ਜਿਨ੍ਹਾਂ ਦੇ ਕਾਰਣ
ਰੋਵਣ ਨੈਣ ਜਿਨ੍ਹਾਂ ਦੇ ਕਾਰਣ, ਸੋ ਸਿਕਦਿਆਂ ਮਿਲਣ ਕਦਾਹੀਂ ।
ਜਿਨ੍ਹਾਂ ਨਾਲ ਨ ਮਤਲਬ ਕੋਈ, ਸੋ ਦਿਸਣ ਸੰਝ ਸਬਾਹੀਂ ।
ਤਰਸਣ ਨੈਣ ਨ ਚਲਦੇ ਜ਼ੋਰੇ, ਮੇਰੇ ਦਿਲ ਵਿਚ ਭੜਕਣ ਭਾਹੀਂ ।
ਹਾਸ਼ਮ ਆਖ ਲਚਾਰ ਕੀ ਕਰੀਏ, ਇਹੋ ਵਿਰਦ ਅਸਾਡਾ ਆਹੀਂ ।
ਰੁੱਖਾਂ ਪੌਣ ਪਰਿੰਦਾਂ ਡਿਠੀ
ਰੁੱਖਾਂ ਪੌਣ ਪਰਿੰਦਾਂ ਡਿਠੀ, ਜੋ ਨਾਲ ਯੂਸਫ਼ ਦੇ ਬੀਤੀ ।
ਪਾਸ ਯਕੂਬ ਯੂਸਫ਼ ਦੀ ਬਿਰਥਾ, ਪਰ ਕਿਸੇ ਬੇਦਰਦ ਨ ਕੀਤੀ ।
ਹੋਤ ਬਿਹੋਸ਼ ਸੱਸੀ ਦੇ ਹਾਲੋਂ, ਉਨ ਜ਼ਹਿਰ ਥਲਾਂ ਵਿਚ ਪੀਤੀ ।
ਹਾਸ਼ਮ ਕਿਸ ਕਿਸ ਨਾਲ ਨ ਕੀਤੀ, ਇਸ ਬ੍ਰਿਹੋਂ ਬਿਦਰਦ ਅਨੀਤੀ ।
ਰੁਖ਼ਸਤ ਹੋ ਗੁਲ ਗਏ ਚਮਨ ਥੋਂ
ਰੁਖ਼ਸਤ ਹੋ ਗੁਲ ਗਏ ਚਮਨ ਥੋਂ, ਅਤੇ ਸਿਹਨ ਸੰਭਾਲੇ ਖਾਰਾਂ ।
ਕਊਆ ਨਜ਼ਰ ਨ ਆਵੇ ਕੋਈ, ਜਿਥੇ ਬੁਲਬੁਲ ਸਾਹਨ ਹਜ਼ਾਰਾਂ ।
ਕਰ ਲੈ ਯਾਦ ਸਗੂਫ਼ਾ ਸਬਜ਼ੀ, ਅਤੇ ਉਹ ਖ਼ੁਸ਼-ਰੋਜ਼ ਬਹਾਰਾਂ ।
ਹਾਸ਼ਮ ਸੋਜ਼ ਅੱਖੀਂ ਵਿਚ ਆਵੇ, ਦੇਖੋ ਬਰਸਨ ਅਬਰ ਬਹਾਰਾਂ ।
ਸਾਜਣ ਤੌਕ ਜੰਜ਼ੀਰਾਂ ਬਾਝੋਂ
ਸਾਜਣ ਤੌਕ ਜੰਜ਼ੀਰਾਂ ਬਾਝੋਂ, ਜਿੰਦ ਕਰਦੇ ਕੈਦ ਸਵਾਈ ।
ਜਿਸ ਦੇ ਭਾਗ ਨਸੀਬੋਂ ਜਾਹਨ, ਸੋ ਪੈਂਦਾ ਨੀਂਦ ਪਰਾਈ ।
ਲੱਖ ਲੱਖ ਐਬ ਮਿਲਣ ਵਿਚ ਉਠਦੇ, ਸਿਰ ਤੁਹਮਤ ਵੈਰ ਜੁਦਾਈ ।
ਹਾਸ਼ਮ ਇਸ਼ਕ ਖਰਾਬ ਕਰੇਂਦਾ, ਅਤੇ ਵਸਦੀ ਲਾਖ ਲੁਕਾਈ ।
