ਸੁੰਦਰ ਸੁਘੜ ਰਸੀਲੇ ਰਸੀਏ
ਸੁੰਦਰ ਸੁਘੜ ਰਸੀਲੇ ਰਸੀਏ, ਕਈ ਕੋਟ ਜਗਤ ਵਿਚ ਆਏ ।
ਲਖ ਹਾਥੀ ਲਖ ਲਸ਼ਕਰ ਘੋੜੇ, ਵਿਚ ਏਸ ਜ਼ਿਮੀਨ ਸਮਾਏ ।
ਪਲ ਛਲ ਖ਼ੁਆਬ ਖ਼ਿਆਲ ਵਸੇਰਾ, ਕੋਈ ਕਾਸ ਪਿਛੇ ਭੁਲ ਜਾਏ ।
ਹਾਸ਼ਮ ਕਿਸ ਜੀਵਨ ਭਰਵਾਸੇ, ਅਸੀਂ ਮਿਤਰਾਂ ਚਾ ਭੁਲਾਏ ।
ਸੁਣ ਜਾਨੀ ! ਤੈਨੂੰ ਲਿਖ ਜਾਨੀ
ਸੁਣ ਜਾਨੀ ! ਤੈਨੂੰ ਲਿਖ ਜਾਨੀ, ਪਰ ਜਾਨ ਨਹੀਂ ਵਲ ਜਾਨੀ ।
ਕਿਸ ਨੂੰ ਹੋਗੁ ਸ਼ਨਾਸ ਅਜੇਹਾ, ਜੇਹੜੀ ਹੋਗੁ ਖ਼ਰਾਬ ਦੀਵਾਨੀ ।
ਤੇਰੇ ਸ਼ੌਕ ਪਿਛੇ ਦਿਲ ਮੇਰੇ, ਸਭ ਜਾਣੀ ਖ਼ਲਕ ਬੇਗਾਨੀ ।
ਹਾਸ਼ਮ ਵਾਰ ਸੁਟੀ ਜਿੰਦ ਮੇਰੀ, ਤੇਰੇ ਇਸ਼ਕ ਉਤੋਂ ਕੁਰਬਾਨੀ ।
ਸੁਣ ਇਸ਼ਕਾ ! ਜੇਹੀ ਤੁਧ ਨੇ ਕੀਤੀ
ਸੁਣ ਇਸ਼ਕਾ ! ਜੇਹੀ ਤੁਧ ਨੇ ਕੀਤੀ, ਤੂੰ ਰੋਜ਼ ਸਤਾਵੇਂ ਮੈਨੂੰ ।
ਇਕ ਵਾਰੀ ਨਿਤ ਆਵੇਂ ਮੇਰੇ, ਮੈਂ ਖ਼ੂਬ ਰੁਲਾਵਾਂ ਤੈਨੂੰ ।
ਤੇਰੇ ਜੇਡ ਬੇਵਫ਼ਾ ਨ ਕੋਈ, ਮੈਂ ਕੂਕ ਸੁਣਾਵਾਂ ਕੈਂ ਨੂੰ ।
ਹਾਸ਼ਮ ਖ਼ੁਆਰ ਕਰੇਂ ਜਗ ਸਾਰੇ, ਤੂੰ ਯਾਰ ਬਣਾਵੇਂ ਜੈਂ ਨੂੰ ।
ਸੁੱਟਾਂ ਵਾਰ ਬਹਿਸ਼ਤਾਂ ਲੋਕਾਂ
ਸੁੱਟਾਂ ਵਾਰ ਬਹਿਸ਼ਤਾਂ ਲੋਕਾਂ, ਜੇ ਰੀਸ ਕਰਨ ਦਿਲਬਰ ਦੀ ।
ਦੋਜ਼ਖ ਕੌਣ ਕਰੇਨ ਬਰਾਬਰ, ਇਸ ਆਤਸ਼ ਸੋਜ਼ ਹਿਜਰ ਦੀ ।
ਦੋਵੇਂ ਥੋਕ ਨਹੀਂ ਵਸ ਮੇਰੇ, ਮੈਂ ਗਰਦ ਤੁਸਾਡੇ ਦਰ ਦੀ ।
ਹਾਸ਼ਮ ਰਾਹ ਅਜੇਹੇ ਪਾਈ, ਮੈਂ ਇਸ਼ਕ ਤੇਰੇ ਦੀ ਬਰਦੀ ।
