ਨਾ ਕਾਬਲੇ ਤਸਖ਼ੀਰ। ਭਾਰਤ ਦੇ ਪੁਰਾਣੇ ਮਾਡਲ ਦੇ ਘਟੀਆ ਟੈਂਕ ਇਹਨਾਂ ਦਾ ਟਾਕਰਾ ਨਹੀਂ ਕਰ ਸਕਦੇ। ਫਿਰ ਸਾਡੇ ਕੋਲ ਜੈੱਟ ਤੇ ਸੁਪਰ ਸੈਨਿਕ ਹਵਾਈ ਜਹਾਜ਼ ਹਨ। ਮੁਕਾਬਲੇ 'ਤੇ ਭਾਰਤ ਦੇ ਨੈੱਟ ਜਹਾਜ਼ ਸਿਰਫ਼ ਖਿਲੋਣੇ ਹਨ। ਕੋਈ ਮੁਕਾਬਲਾ ਹੀ ਨਹੀਂ। ਸਾਡੇ ਦੋਸਤਾਂ ਨੂੰ ਯਾਦ ਰੱਖਣਾ ਚਾਹੀਦਾ ਹੈ, ਕਿ ਜ਼ਮਾਨਾ ਹਾਲ ਵਿੱਚ ਆਦਮ-ਗਿਣਤੀ ਨਹੀਂ, ਹਥਿਆਰ ਜਿੱਤਦੇ ਹਨ। ਇਹਨਾਂ ਵਧੀਆ ਹਥਿਆਰਾਂ ਦੀ ਬਿਨਾ ਉੱਤੇ ਅਸੀਂ ਦਾਅਵੇ ਨਾਲ ਕਹਿ ਸਕਦੇ ਹਾਂ ਕਿ ਸਾਡੀ ਫਤਹਿ ਯਕੀਨੀ ਹੈ।

ਹੁਣ ਤਜਵੀਜ਼ ਸੁਣੋ। ਸਾਡੇ ਕੋਲ ਮੁਜਾਹਿਦਾਂ ਦੀ ਫ਼ੌਜ ਤਿਆਰ ਹੈ। ਹਕੀਕੀ ਦੋਸਤ ਚੀਨ ਦੀ ਮਦਦ ਨਾਲ ਅਸੀਂ ਉਹਨਾਂ ਨੂੰ ਗੁਰੀਲਾ ਲੜਾਈ ਵਾਸਤੇ ਤਿਆਰ ਕਰ ਲਿਆ ਹੈ। ਆਪਣਿਆਂ ਦੇ ਸਾਮ੍ਹਣੇ ਕਿਸੇ ਭੇਤ ਨੂੰ ਲੁਕਾਉਣ ਦੀ ਜ਼ਰੂਰਤ ਨਹੀਂ। ਮੇਜਰ ਜੈਨਰਲ ਅਖ਼ਤਰ ਹੁਸੈਨ ਮਲਿਕ ਜੀ.ਓ.ਸੀ. (ਜੈਨਰਲ ਆਫ਼ਿਸਰ ਕਮਾਂਡਰ) ਬਾਰ੍ਹਵੀਂ ਡਵੀਜ਼ਨ ਦੇ ਮਾਤਹਿਤ ਸਾਡੀ ਜਿਬਰਾਲਟਰ ਫ਼ੋਰਸ ਤਿਆਰ ਖਲੀ ਹੈ। ਉਸ ਨੂੰ ਅੱਗੇ ਅੱਠ ਹਿੱਸਿਆਂ ਵਿੱਚ ਵੰਡਿਆ ਗਿਆ ਹੈ। ਹਰ ਇਕ ਫ਼ੌਜ ਵਿੱਚ ਛੇ ਕੰਪਨੀਆਂ (ਛੇ ਸੌ ਸੱਠ ਜਵਾਨ) ਹਨ। ਹਰ ਫ਼ੌਜ ਦਾ ਨਾਮ 'ਖ਼ਾਲਿਦ', 'ਖ਼ਿਲਜੀ', 'ਜਲਾਲੁਦੀਨ', 'ਕਾਸਿਮ', 'ਗ਼ਜ਼ਨਵੀਂ', 'ਬਾਬਰ' ਵਗੈਰਾ ਨਾਮਵਰ ਹਸਤੀਆਂ ਦੇ ਨਾਮ ਉੱਤੇ ਰੱਖਿਆ ਗਿਆ ਹੈ। ਹਰ ਇਕ ਕੰਪਨੀ ਦੀ ਕਮਾਨ ਕਰਨ ਵਾਲਾ ਪਾਕਿਸਤਾਨ ਦੀ ਬਕਾਇਦਾ ਫ਼ੌਜ ਦਾ ਕੋਈ ਮੇਜਰ ਜਾਂ ਕੈਪਟਨ ਹੈ। ਸਾਡੀ ਰਾਏ ਮੁਤਾਬਕ ਉਹਨਾਂ ਨੂੰ ਪਹਿਲੀ ਅਗਸਤ ਤੋਂ ਕਸ਼ਮੀਰ ਵਿੱਚ ਦਾਖ਼ਲ ਕਰ ਦਿੱਤਾ ਜਾਵੇ। ਉਹ ਬਿਨਾਂ ਵਰਦੀ ਦੇ ਹੋਣਗੇ, ਮਗਰ ਹਥਿਆਰ ਨਾਲ ਪੂਰੀ ਤਰ੍ਹਾਂ ਲੈਸ। ਉਹਨਾਂ ਦਾ ਪਹਿਲਾ ਕੰਮ ਕਸ਼ਮੀਰੀ ਮੁਸਲਮਾਨਾਂ ਨੂੰ ਭਾਰਤ ਸਰਕਾਰ ਦੇ ਵਿਰੁੱਧ ਭੜਕਾ ਕੇ ਬਗ਼ਾਵਤ ਕਰਵਾਉਣਾ ਹੋਵੇਗਾ। ਉਮੀਦ ਹੈ ਕਿ ਮਜ਼੍ਹਬ ਦੇ ਨਾਮ ਉੱਤੇ ਸਾਰੇ ਕਸ਼ਮੀਰੀ ਮੁਸਲਮਾਨ ਸਾਡੇ ਨਾਲ ਮਿਲ ਕੇ ਬਗਾਵਤ ਕਰ ਦੇਣਗੇ। ਇਸ ਤਰ੍ਹਾਂ ਕਸ਼ਮੀਰ ਸਰਕਾਰ ਦਾ ਤਖ਼ਤਾ ਉਲਟਾ ਦਿੱਤਾ ਜਾਵੇਗਾ। ਭਾਰਤੀ ਫ਼ੌਜ ਉਸ ਬਗਾਵਤ ਨੂੰ ਦਬਾਉਣ ਵਾਸਤੇ ਕਸ਼ਮੀਰੀਆਂ ਉੱਤੇ ਜ਼ੁਲਮ ਤੇ ਤਸ਼ੱਦਦ ਕਰੇਗੀ ਤਾਂ ਅਸੀਂ ਬਾਗ਼ੀਆਂ ਦੀ ਮਦਦ ਦੇ ਬਹਾਨੇ ਕਸ਼ਮੀਰ ਉੱਤੇ ਹਮਲਾ ਕਰ ਦਿਆਂਗੇ। ਪਿਛਲੀਆਂ ਰਵਾਇਤਾਂ ਮੁਤਾਬਕ ਖ਼ਿਆਲ ਕੀਤਾ ਜਾ ਸਕਦਾ ਹੈ ਕਿ ਭਾਰਤ ਸਿਰਫ਼ ਓਥੇ ਹੀ ਜਵਾਬੀ ਕਾਰਵਾਈ ਕਰੇਗਾ, ਜਿੱਥੇ ਅਸੀਂ ਹਮਲਾ ਕਰਾਂਗੇ। ਉਹ ਕਸ਼ਮੀਰ ਤੋਂ ਬਾਹਰ ਲੜਾਈ ਵਧਾਉਣ ਵਿੱਚ ਪਹਿਲ ਨਹੀਂ ਕਰੇਗਾ, ਪਰ ਅਸੀਂ ਇਕ ਪਾਸੇ ਛੰਬ ਸੈਕਟਰ ਵਿੱਚ ਹਮਲਾ ਕਰਕੇ ਅਖਨੂਰ ਤੇ ਊਧਮਪੁਰ