ਪਾਕਿਸਤਾਨ ਦੀ ਜਨਤਾ ਦਾ ਬਚਾਅ ਕੀਤਾ ਜਾਵੇ। ਭਾਵੇਂ ਤਾਕਤ ਦੀ ਵਰਤੋਂ ਘੱਟ ਤੋਂ ਘੱਟ ਕੀਤੀ ਜਾਵੇ। ਹਾਂ, ਦੁਸ਼ਮਣ ਦੀ ਫ਼ੌਜ ਨੂੰ ਪੂਰੀ ਤਾਕਤ ਨਾਲ ਹੀ ਜਵਾਬ ਦੇਣਾ ਹੋਵੇਗਾ। ਸਰਕਾਰ ਹਰ ਤਰ੍ਹਾਂ ਫ਼ੌਜ ਦੇ ਨਾਲ ਹੈ। ਅਗਲੇ ਦਿਨ ਸ਼ਾਸਤਰੀ ਜੀ ਨੇ ਇਹ ਐਲਾਨ ਲੋਕ ਸਭਾ ਵਿੱਚ ਵੀ ਦੁਹਰਾ ਦਿੱਤਾ।

੧०.

"ਐਧਰ ਵੇਖੋ।" ਲੈਫਟੀਨੈਂਟ ਜੈਨਰਲ ਹਰਬਖ਼ਸ਼ ਸਿੰਘ ਨੇ ਮੇਜ਼ ਉੱਤੇ ਵਿਛੇ ਹੋਏ ਨਕਸ਼ੇ ਵੱਲ ਇਸ਼ਾਰਾ ਕਰਕੇ ਕਿਹਾ। ਉਹ ਸਾਰੇ ਪੱਛਮੀ ਮੋਰਚੇ ਦਾ ਆਰਮੀ ਕਮਾਂਡਰ ਸੀ। "ਆਹ ਏ ਉੜੀ। ਦੱਖਣ ਵੱਲ ਆਹ ਏ ਪੁਣਛ। ਦੋਹਾਂ ਦੇ ਵਿੱਚ ਪੈਂਦਾ ਏ ਦੱਰਰਾ ਹਾਜੀ ਪੀਰ, ਸਮਝ ਗਏ?"

"ਠੀਕ ਏ ਸਾਹਬ।"

"ਏਥੋਂ ਪਾਕਿਸਤਾਨ ਦੀ ਜੰਗ ਬੰਦੀ ਲਾਈਨ ਘੋੜੇ ਦੇ ਸੁੰਮ ਵਾਂਗ ਸਾਡੇ ਇਲਾਕੇ ਵਿੱਚ ਵਧੀ ਹੋਈ ਹੈ। ਏਸੇ ਰਾਹੇ, ਭਾਵ ਦੱਰਾ ਹਾਜੀ ਪੀਰ ਰਾਹੀਂ ਪਾਕਿਸਤਾਨੀ ਧਾੜਵੀ ਸਾਡੇ ਇਲਾਕੇ ਵਿੱਚ ਦਾਖ਼ਲ ਹੁੰਦੇ ਹਨ। ਅਸੀਂ ਆਹ ਲਾਈਨ ਸਿੱਧੀ ਕਰ ਦੇਣੀ ਹੈ।" ਸ. ਹਰਬਖ਼ਸ਼ ਸਿੰਘ ਨੇ ਨਕਸ਼ੇ ਉੱਤੇ ਪੈਨਸਿਲ ਨਾਲ ਲਕੀਰ ਖਿੱਚ ਕੇ ਉੜੀ ਤੇ ਪੁਣਛ ਨੂੰ ਮਿਲਾ ਦਿੱਤਾ।

"ਠੀਕ ਏ ਸਾਹਬ।"

"ਪੁਣਛ ਵਾਲੇ ਪਾਸਿਓਂ ਲੈਫਟੀਨੈਂਟ ਕਰਨਲ ਐਨ. ਐਨ. ਖੰਨਾ ਐਡਵਾਨਸ ਕਰੇਗਾ।" ਸ. ਹਰਬਖ਼ਸ਼ ਸਿੰਘ ਨੇ ਆਪਣੀ ਗੱਲ ਜਾਰੀ ਰੱਖੀ। "ਉੜੀ ਵਾਲੇ ਪਾਸਿਓਂ ਮੇਜਰ ਰਣਜੀਤ ਸਿੰਘ ਡਿਆਲ ਅੱਗੇ ਵਧੇਗਾ। ਇਸ ਪਹਾੜੀ ਨੂੰ ਸੰਖ ਚੋਟੀ ਕਹਿੰਦੇ ਹਨ। ਇਸ ਦੀ ਉਚਾਈ 8541 ਫੁੱਟ ਹੈ। ਇਸ ਉੱਤੇ ਦੁਸ਼ਮਣ ਦਾ ਸਖ਼ਤ ਮੋਰਚਾ ਹੈ। ਇਸ ਉੱਤੇ ਛੇਤੀ ਤੋਂ ਛੇਤੀ ਕਬਜ਼ਾ ਕਰ ਲੈਣਾ ਚਾਹੀਦਾ ਹੈ। ਜਿਸ ਦਾ ਸੰਖ ਚੋਟੀ ਉੱਤੇ ਕਬਜ਼ਾ, ਓਸ ਦਾ ਦਰਰਾ ਹਾਜੀ ਪੀਰ ਉੱਤੇ ਕੰਟਰੋਲ। ਸਮਝ ਗਏ ?"

"ਠੀਕ ਏ ਸਾਹਬ।"

"ਮੈਨੂੰ ਆਪਣੇ ਬਹਾਦਰ ਜਵਾਨਾਂ ਉੱਤੇ ਮਾਣ ਹੈ। ਆਸ ਹੈ, ਸਗੋਂ ਮੈਨੂੰ ਭਰੋਸਾ ਹੈ ਕਿ ਭਾਰਤੀ ਸੈਨਾ ਆਪਣੀ ਅਦੁੱਤੀ ਸ਼ਾਨ ਨੂੰ ਕਾਇਮ ਰੱਖੇਗੀ।"