"ਹੱਛਾ, ਅਸੀਂ ਆਪ ਵੀ ਜਹਾਜ਼ ਬਨੌਣ ਲੱਗ ਪਏ ਆਂ ?" ਕਰਮ ਸਿੰਘ ਭਾਊ ਨੇ ਕੁਛ ਹੈਰਾਨੀ ਨਾਲ ਪੁੱਛਿਆ।

"ਨਿਰੇ ਜਹਾਜ਼ ਈ ਨਹੀਂ, ਅਸੀਂ ਬਹੁਤ ਕੁਛ ਬਨਾਉਣ ਲੱਗ ਪਏ ਆਂ।" ਕਾਮਰੇਡ ਨੇ ਭਾਊ ਵੱਲ ਕੁਛ ਭੇਤ ਭਰੀ ਨਜ਼ਰ ਨਾਲ ਤਕਦਿਆਂ ਕਿਹਾ। "ਪਹਿਲੇ ਹੱਲੇ ਈ ਸਾਡੇ ਛੋਟੇ ਨੈੱਟ ਨੇ ਪਾਕਿਸਤਾਨ ਦਾ ਮੈਂਬਰ ਜੈੱਟ ਮਾਰ ਗਿਰਾਇਆ।"

"ਦੇ ਮਾਰਾ ਸ਼ਾਬਾਸ਼!.... ਬੋ ਕਾਟਾ!" ਪਿੱਛੋਂ ਕਈ ’ਵਾਜ਼ਾਂ ਕੱਠੀਆਂ ਆਈਆਂ।

"ਤੇ ਇਹ ਬੋਹਣੀ ਕੀਤੀ ਸਕੂਆਰਡਨ ਲੀਡਰ ਟਰੈਵਰ ਕੀਲਰ (Sqn. Ldr. Trevor Keelor) ਨੇ। ਅਗਲੇ ਦਿਨ ਫੇਰ ਸੋਬਰ ਜੈੱਟਾਂ ਤੇ ਸਾਡੇ ਨੈੱਟ ਜਹਾਜ਼ਾਂ ਦੀ ਟੱਕਰ ਹੋਈ। ਸਾਡੇ ਸੂਰਮੇ ਆਏ ਦੁਸ਼ਮਣ ਨੂੰ ਸੁੱਕਿਆਂ ਨਹੀਂ ਜਾਣ ਦੇਂਦੇ। ਫ਼ਲਾਈਟ ਲੈਫ਼ਟੀਨੈਂਟ ਸ. ਵੀਰੇਂਦਰ ਸਿੰਘ ਨੇ ਇਕ ਮੈਂਬਰ ਜੈੱਟ ਹੋਰ ਮਾਰ ਗਿਰਾਇਆ। ਪਹਿਲਾਂ ਉਹਨੇ ਛੇ ਸੌ ਗਜ਼ ਦੇ ਫ਼ਾਸਲੇ ਤੋਂ ਵਾਰ ਕੀਤਾ, ਫੇਰ ਪੰਜ ਸੌ ਗਜ਼ ਤੋਂ ਤੇ ਤੀਸਰਾ ਵਾਰ ਚਾਰ ਸੋ ਗਜ਼ ਦੇ ਫ਼ਾਸਲੇ ਤੋਂ ਕੀਤਾ। ਮੁੱਕਦੀ ਗੱਲ, ਓਨਾ ਚਿਰ ਉਹਨੇ ਦੁਸ਼ਮਣ ਦਾ ਪਿੱਛਾ ਨਾ ਛੱਡਿਆ ਜਿੰਨਾ ਚਿਰ, ਜਹਾਜ਼ ਸੋਹਲੇ ਛੱਡਦਾ ਧਰਤੀ 'ਤੇ ਨਹੀਂ ਆ ਪਿਆ।"

"ਫਿਰ ਜਦ ਮਗਰ ਈ ਲੱਗ ਪਏ, ਤਾਂ ਕੰਮ ਅਧੂਰਾ ਕੀ ਛੱਡਣਾ ਹੋਇਆ।" ਅਮਲੀ ਨੇ ਦਿਲੀ ਖ਼ੁਸ਼ੀ ਪ੍ਰਗਟ ਕਰਦਿਆਂ ਕਿਹਾ।

"ਇਹਨਾਂ ਤਿੰਨਾਂ ਦਿਨਾਂ ਦੀ ਲੜਾਈ ਵਿੱਚ ਪਾਕਿਸਤਾਨ ਤੇ ਉਹਦੇ ਦੋਸਤਾਂ ਵਿੱਚ ਘਬਰਾਹਟ ਪੈਦਾ ਹੋ ਗਈ ਏ।" "ਹੋਣੀ ਈ ਸੀ, ਸਿਰ ਮੁੰਨਦਿਆਂ ਈ ਤਾਂ ਗੜ੍ਹੇ ਵਰਨੇ ਸ਼ੁਰੂ ਹੋ ਗਏ ਸਨ ਜਿਨ੍ਹਾਂ ਵਿਚੋਂ ਸੋਲਾਂ ਪੈਟਨ ਸਨ। ਘਬਰਾਹਟ ਦਾ ਪਤਾ ਏਸ ਗੱਲ ਤੋਂ ਲਗਦਾ ਏ, ਕਿ ਚੀਨ ਦਾ ਬਦੇਸ਼ ਮੰਤਰੀ ਮਾਰਸ਼ਲ ਚੇਂਨ ਯੀ (Chen Yi) ਕੱਲ ਕਰਾਚੀ ਭੱਜਾ ਭੱਜਾ ਆਇਆ ਏ, ਤੇ ਉਹਨੇ ਲਗਾਤਾਰ ਛੇ ਘੰਟੇ ਭੁੱਟੋ ਨਾਲ ਮੁਲਾਕਾਤ ਕੀਤੀ ਏ।"

"ਇਹ ਆਖਣ ਆਇਆ ਹੋਣਾ ਏਂ, ਚੜ੍ਹ ਜਾ ਬੱਚਾ ਸੂਲੀ, ਰਾਮ ਭਲੀ ਕਰੇਗਾ।"

"ਕਿਉਂ ? ਭਾਊ, ਅਮਲੀ ਦਾ ਨਸ਼ਾ ਵੀ ਖਿੜਿਆ ਈ, ਸੂਰਮਿਆਂ ਦੀਆਂ ਗੱਲਾਂ ਸੁਣ ਕੇ।" ਭਾਊ ਨੇ ਅਮਲੀ ਨਾਲ ਖ਼ੁਸ਼ੀ ਸਾਂਝੀ ਕਰਦਿਆਂ ਕਿਹਾ।

"ਮਖ : ਪੁੱਛ ਕੁਛ ਨਾ ਕਿ। ਫੀਮ ਖਾਣੀ ਤਾਂ ਚਰੋਕਣੀ ਛੱਡ ਦਿੱਤੀ ਏ। ਹੁਣ ਏਨਾ ਨਸ਼ਾ ਏ ਕਿ ਸਾਡਾ ਦੇਸ਼ ਜਿੱਤੇ।" ਸੱਚ ਮੁੱਚ ਹੀ ਅਮਲੀ ਹੁਣ ਨਾਂ ਦਾ ਅਮਲੀ ਸੀ। ਅਫ਼ੀਮ ਖਾਣੀ ਉਹ ਕਈ ਸਾਲ ਤੋਂ ਛੱਡ ਚੁੱਕਾ ਸੀ।

"ਚੀਨ ਲੜਾਈ ਪਸੰਦ ਦੇਸ਼ ਏ। ਉਹ ਨਹੀਂ ਚਾਹੁੰਦਾ ਕਿ ਪਾਕਿਸਤਾਨ ਤੇ