ਹੈ ਕਿ ਦੂਸਰੇ ਸੰਸਾਰ ਯੁੱਧ ਨੂੰ ਦੁਨੀਆ ਦੇ ਲੋਕ ਦੇਰ ਤੱਕ ਯਾਦ ਰੱਖਣਗੇ। ਜਰਮਨੀ ਦੇ ਪ੍ਰਸਿੱਧ ਜਰਨੈਲ ਰੋਮੇਲ ਨੂੰ ਉਸ ਸਮੇਂ ਦਾ ਮਹਾਨ ਯੋਧਾ ਮੰਨਿਆ ਜਾਂਦਾ ਹੈ। ਅਨਾਮੀਲ ਦੀ ਲੜਾਈ ਵਿੱਚ ਰੋਮੇਲ ਦੀਆਂ ਫ਼ੌਜਾਂ ਨੇ ਇਕ ਦਿਨ ਵਿੱਚ ਦੁਸ਼ਮਣ ਦੇ ਸੱਤ ਟੈਂਕ ਤਬਾਹ ਕੀਤੇ ਸਨ। ਵਰਤਮਾਨ ਭਾਰਤ ਪਾਕਿਸਤਾਨ ਦੀ ਲੜਾਈ ਨੇ ਉਸ ਭਿਆਨਕ ਯੁੱਧ ਦੀ ਯਾਦ ਤਾਜ਼ਾ ਕਰ ਦਿੱਤੀ ਹੈ। ਪੰਦਰਾਂ ਸਤੰਬਰ ਦੇ ਦੋ ਸੂਰਜਾਂ ਅੰਦਰ, ਭਾਵ ਸਿਰਫ਼ ਬਾਰਾਂ ਘੰਟਿਆਂ ਵਿੱਚ ਭਾਰਤ ਦੀ ਬੀਰ ਸੈਨਾ ਨੇ ਪਾਕਿਸਤਾਨ ਦੇ 66 ਟੈਂਕ ਤਬਾਹ ਕੀਤੇ ਹਨ, ਜਿਨ੍ਹਾਂ ਵਿਚੋਂ ਬਹੁਤੇ ਪੈਟਨ ਟੈਂਕ ਸਨ। ਅੱਗੇ ਲਿਖਦਾ ਹੈ, ਪਰ ਦੋਹਾਂ ਲੜਾਈਆਂ ਵਿੱਚ ਇਕ ਵੱਡਾ ਫ਼ਰਕ ਹੈ। ਜਿੱਥੇ ਸੱਠਾਂ ਦੇ ਮੁਕਾਬਲੇ 'ਤੇ ਜਰਮਨੀ ਦੇ ਪੰਜਤਾਲੀ ਟੈਂਕ ਤਬਾਹ ਹੋਏ ਹਨ, ਉਥੇ ਛਿਆਹਠਾਂ ਦੇ ਟਾਕਰੇ ਭਾਰਤ ਦੇ ਸਿਰਫ਼ ਅਠਾਈ। ਇਹ ਭਾਰਤੀ ਸੈਨਾ ਦੀ ਮਹਾਨ ਜਿੱਤ ਹੈ।"

"ਵਾਹ! ਯੋਧਿਆਂ ਹੱਦ ਮੁਕਾ ਦਿੱਤੀ ਕਿ।" ਅਮਲੀ ਨੇ ਆਪਣੀ ਫ਼ੌਜ ਦੀ ਜਿੱਤ ਦੀ ਖ਼ੁਸ਼ੀ ਵਿੱਚ ਝੂਮਦਿਆਂ ਕਿਹਾ।

“ਭਾਊ! ਅਸੀਂ ਨਾ ਲੜੀਏ, ਤਾਂ ਭਾਵੇਂ ਉਤੋਂ ਦੀ ਗੱਡੀ ਲੰਘ ਜਾਵੇ, ਤੇ ਜੇ ਲੜ ਪਈਏ ਤਾਂ, ਮਖ, ਹਾਹੋ ।" ਨਵੇਂ ਅੱਗੇ ਵਧੂ ਕਲਾਕਾਰ ਦੀ ਅਧੂਰੀ ਕਹਾਣੀ ਵਾਂਗ ਕਰਮ ਸਿੰਘ ਭਾਊ ਨੇ ਵਾਕ ਅਧੂਰਾ ਛੱਡ ਦਿੱਤਾ।

"ਫਿਰ ਚੌਂਤੀ ਸਾਲਾ ਜਵਾਨ, ਟੈਂਕ ਡਵੀਜ਼ਨ ਦੇ ਮੇਜਰ ਭੁਪਿੰਦਰ ਸਿੰਘ ਨੇ ਇਸ ਲੜਾਈ ਵਿੱਚ ਬਹਾਦਰੀ ਦਾ ਇਕ ਨਵਾਂ ਰੀਕਾਰਡ ਕਾਇਮ ਕਰ ਦਿੱਤਾ ਏ।"

"ਉਹ ਵੀ ਫਰਮਾ ਦਿਹੋਂ।" ਅਮਲੀ ਨੇ ਸ਼ਰਧਾ ਨਾਲ ਕਿਹਾ।

"ਉਸ ਦਿਨ ਮੈਂ ਤੁਹਾਨੂੰ ਖੇਮਕਰਨ ਦੀ ਲੜਾਈ ਵਿੱਚ ਪਾਕਿਸਤਾਨ ਦੇ ਤਿੰਨ ਟੈਂਕ ਉਡਾਉਣ ਵਾਲੇ ਯੋਧੇ ਅਬਦੁਲ ਹਮੀਦ ਬਾਰੇ ਦੱਸਿਆ ਸੀ।"

"ਹਾਂ।" ਅਮਲੀ ਨੇ ਰਸਮੀ ਤੌਰ 'ਤੇ ਹੁੰਗਾਰਾ ਭਰਿਆ।

"ਭਾਰਤ ਸਰਕਾਰ ਨੇ ਉਸ ਸੂਰਮੇ ਨੂੰ 'ਪਰਮਵੀਰ ਚੱਕਰ' ਦਾ ਫ਼ੌਜੀ ਸਨਮਾਨ ਦਿੱਤਾ ਹੈ।"

"ਚਾਹੀਦਾ ਹੀ ਸੀ। ਜਿਹੜਾ ਕੋਈ ਸੂਰਮਗਤੀ ਦਾ ਕਾਰਨਾਮਾ ਕਰੇ, ਉਹਦਾ ਆਦਰ ਸਨਮਾਨ ਕਰਨਾ ਸਾਡਾ ਫ਼ਰਜ਼ ਹੈ।"

"ਮੇਜਰ ਭੁਪਿੰਦਰ ਸਿੰਘ ਨੇ ਸਿਰਫ਼ ਢਾਈ ਮਿੰਟਾਂ ਵਿੱਚ ਪਾਸਿਤਾਨ ਦੇ ਸੱਤ ਟੈਂਕ ਤਬਾਹ ਕੀਤੇ ਨੇ।"

“ਭਾਊ! ਜੰਮਣਾ ਈ ਏਹੋ ਜਿਹੇ ਮਰਦਾਂ ਦਾ ਏ। ਹੋਰ ਗੀਦੀ ਦਾ ਕੀ ਨਾਂ ਲੈਣਾ ਹੁੰਦਾ ਏ।"