60. ਜੇਤੀ ਜੇਤੀ ਦੁਨੀਆਂ ਰਾਮ ਜੀ

ਜੇਤੀ ਜੇਤੀ ਦੁਨੀਆਂ ਰਾਮ ਜੀ,

- ਤੇਰੇ ਕੋਲੋਂ ਮੰਗਦੀ ।ਰਹਾਉ।

 

ਕੂੰਡਾ ਦੇਈਂ ਸੋਟਾ ਦੇਈਂ,

ਕੋਠੀ ਦੇਈਂ ਭੰਗ ਦੀ ।

 

ਸਾਫ਼ੀ ਦੇਈਂ ਮਿਰਚਾਂ ਦੇਈਂ,

ਬੇ-ਮਿਨਤੀ ਦੇਈਂ ਰੰਗ ਦੀ ।

 

ਪੋਸਤ ਦੇਈਂ ਬਾਟੀ ਦੇਈਂ,

ਚਾਟੀ ਦੇਈਂ ਖੰਡ ਦੀ ।

 

ਗਿਆਨ ਦੇਈਂ ਧਿਆਨ ਦੇਈਂ,

ਮਹਿਮਾ ਸਾਧੂ ਸੰਗ ਦੀ ।

 

ਸ਼ਾਹ ਹੁਸੈਨ ਫ਼ਕੀਰ ਸਾਂਈਂ ਦਾ,

ਇਹ ਦੁਆਇ ਮਲੰਗ ਦੀ ।

 

61. ਝੁਮੇ ਝੁਮ ਖੇਲਿ ਲੈ ਮੰਝ ਵੇਹੜੇ

ਝੁਮੇ ਝੁਮ ਖੇਲਿ ਲੈ ਮੰਝ ਵੇਹੜੇ,

ਜਪਦਿਆਂ ਨੂੰ ਹਰਿ ਨੇੜੇ ।1।ਰਹਾਉ।

 

ਵੇਹੜੇ ਦੇ ਵਿਚ ਨਦੀਆਂ ਵਗਣਿ,

ਬੇੜੇ ਲੱਖ ਹਜ਼ਾਰ,

ਕੇਤੀ ਇਸ ਵਿਚ ਡੁੱਬਦੀ ਡਿੱਠੀ,

ਕੇਤੀ ਲੰਘੀ ਪਾਰਿ ।1।

 

ਇਸ ਵੇਹੜੇ ਦੇ ਨੌਂ ਦਰਵਾਜ਼ੇ,

ਦਸਵੇਂ ਕੁਲਫ਼ ਚੜ੍ਹਾਈ,

ਤਿਸੁ ਦਰਵਾਜ਼ੇ ਦੀ ਮਹਿਰਮੁ ਨਾਹੀਂ,

ਜਿਤੁ ਸਹੁ ਆਵਹਿ ਜਾਈ ।2।