8. ਅਹਿਨਿਸਿ ਵਸਿ ਰਹੀ ਦਿਲ ਮੇਰੇ

ਅਹਿਨਿਸਿ ਵਸਿ ਰਹੀ ਦਿਲ ਮੇਰੇ,

ਸੂਰਤਿ ਯਾਰੁ ਪਿਆਰੇ ਦੀ ।

 

ਬਾਗ਼ ਤੇਰਾ ਬਗੀਚਾ ਤੇਰਾ,

ਮੈਂ ਬੁਲਿਬੁਲਿ ਬਾਗ਼ ਤਿਹਾਰੇ ਦੀ ।ਰਹਾਉ।

 

ਆਪਣੇ ਸ਼ਹੁ ਨੂੰ ਆਪ ਰੀਝਾਵਾਂ,

ਹਾਜਤਿ ਨਹੀਂ ਪਸਾਰੇ ਦੀ ।1।

 

ਕਹੈ ਹੁਸੈਨ ਫ਼ਕੀਰ ਨਿਮਾਣਾ,

ਥੀਵਾਂ ਖਾਕਿ ਦੁਆਰੇ ਦੀ ।2।

 

9. ਅਮਲਾਂ ਦੇ ਉਪਰਿ ਹੋਗ ਨਬੇੜਾ

ਅਮਲਾਂ ਦੇ ਉਪਰਿ ਹੋਗ ਨਬੇੜਾ,

ਕਿਆ ਸੂਫੀ ਕਿਆ ਭੰਗੀ ।ਰਹਾਉ।

 

ਜੋ ਰੱਬ ਭਾਵੈ ਸੋਈ ਥੀਸੀ,

ਸਾਈ ਬਾਤ ਹੈ ਚੰਗੀ ।1।

 

ਆਪੈ ਏਕ ਅਨੇਕ ਕਹਾਵੈ,

ਸਾਹਿਬ ਹੈ ਬਹੁਰੰਗੀ ।2।

 

ਕਹੈ ਹੁਸੈਨ ਸੁਹਾਗਨਿ ਸੋਈ,

ਜੇ ਸਹੁ ਦੇ ਰੰਗ ਰੰਗੀ ।3।