128. ਸਾਧਾਂ ਦੀ ਮੈਂ ਗੋਲੀ ਹੋਸਾਂ

ਸਾਧਾਂ ਦੀ ਮੈਂ ਗੋਲੀ ਹੋਸਾਂ,

ਗੋਲੀਆਂ ਦੇ ਕਰਮ ਕਰੇਸਾਂ ।

ਚਉਂਕਾ ਫੇਰੀਂ ਮੈਂ ਦੇਈਂ ਬੁਹਾਰੀ,

ਜੂਠੇ ਬਾਸਨ ਧੋਸਾਂ ।ਰਹਾਉ।

 

ਪਿੱਪਲ ਪਤਿ ਚੁਣੇਂਦੀ ਵੱਤਾ,

ਲੋਕ ਜਾਣੇ ਦੇਵਾਨੀ ।

ਗਹਿਲਾ ਲੋਕ ਨ ਹਾਲ ਦਾ ਮਹਰਮੁ,

ਮੈਨੂੰ ਬਿਰਹੁੰ ਲਗਾਈ ਕਾਨੀਂ ।1।

 

ਲੋਕਾਂ ਸੁਣਿਆ ਦੇਸਾਂ ਸੁਣਿਆ,

ਹੀਰ ਬੈਰਾਗਨਿ ਹੋਈ ।

ਇਕੁ ਸੁਣੇਂਦਾ ਲੱਖ ਸੁਣੇ,

ਮੇਰਾ ਕਹਾਂ ਕਰੈਗਾ ਕੋਈ ।2।

 

ਸਾਵਲ ਦੀ ਮੈਂ ਬਾਂਦੀ ਬਰਦੀ,

ਸਾਵਲ ਮੈਂਹਡਾ ਸਾਂਈਂ ।

ਕਹੈ ਹੁਸੈਨ ਫ਼ਕੀਰ ਨਿਮਾਣਾ,

ਸਾਂਈਂ ਸਿੱਕਦੀ ਨੂੰ ਦਰਸੁ ਦਿਖਾਈਂ ।3।