147. ਤਿਨਾ ਗ਼ਮ ਕੇਹਾ ਸਾਈਂ ਜਿਨ੍ਹਾਂ ਦੇ ਵੱਲਿ

ਤਿਨਾ ਗ਼ਮ ਕੇਹਾ ਸਾਈਂ ਜਿਨ੍ਹਾਂ ਦੇ ਵੱਲਿ ।ਰਹਾਉ।

 

ਸੋਹਣੀ ਸੂਰਤਿ ਦਿਲਬਰ ਵਾਲੀ,

ਰਹੀ ਅੱਖੀਂ ਵਿਚਿ ਗੱਲਿ ।1।

 

ਇਕੁ ਪਲ ਸਜਣ ਜੁਦਾ ਨ ਥੀਵੈ,

ਬੈਠਾ ਅੰਦਰ ਮਲਿ ।2।

 

ਕਹੈ ਹੁਸੈਨ ਫ਼ਕੀਰ ਸਾਈਂ ਦਾ,

ਚਲਣਾ ਅੱਜੁ ਕਿ ਕੱਲ ।3।

 

148. ਤੂੰ ਆਹੋ ਕੱਤ ਵਲੱਲੀ

ਤੂੰ ਆਹੋ ਕੱਤ ਵਲੱਲੀ,

ਨੀ ਕੁੜੀਏ ਤੂੰ ਆਹੋ ਕੱਤ ਵਲੱਲੀ ।ਰਹਾਉ।

 

ਸਾਰੀ ਉਮਰ ਗਵਾਈਆ ਈਵੈਂ,

ਪੱਛੀ ਨ ਘੱਤੀਆ ਛੱਲੀ ।1।

 

ਗਲੀਆਂ ਵਿਚ ਫਿਰੇ ਲਟਕੰਦੀ,

ਇਹ ਗਲਿ ਨਾਹੀਉਂ ਭੱਲੀ ।2।

 

ਕਹੈ ਹੁਸੈਨ ਫ਼ਕੀਰ ਸਾਈਂ ਦਾ,

ਦਾਜ ਵਿਹੂਣੀ ਚੱਲੀ ।3।