ਲਗ ਗਈ ਛੇਤ ਖੇੜਿਓਂ ਸਾਰੀ,

ਖੇੜੇ ਖੇੜਾ ਲਾਇਆ,

ਜਿਉਂ ਖਿੜਿਆ ਸੀ ਸਰਵਰ ਸਾਰਾ

'ਦਿਲ-ਨਾਰੀ' ਖਿੜ ਆਇਆ।

 

ਅੰਦਰ ਫੁੱਟ ਪਿਆ ਜਿਉਂ ਸੋਮਾਂ

ਕੜ ਖੁਸ਼ੀਆਂ ਦਾ ਫੁਟਿਆ,

ਹੁਸਨ ਅੰਦਰੋਂ ਅੰਦਰਲੇ ਦਾ

ਚਸਮੇ ਜਿਉਂ ਫਟ ਛੁਟਿਆ।

 

ਲੂੰ ਲੂੰ ਵਿਚੋਂ ਛੁਟੇ ਛੁਹਾਰੇ,

ਖੇੜੇ ਛਹਿਬਰ ਲਾਈ।

ਅੱਖਾਂ 'ਫਬਨ-ਕਟੋਰੇ ਭਰ ਰਹੇ

ਤ੍ਰੇਲ ਪਏ ਸੁਖਦਾਈ।

 

ਤਨ ਮਨ ਖੀਵਾ ਖੇੜਾ ਪੀ ਪੀ,

ਖੇੜਾ ਸਾਰੀ ਹੋਈ,

ਖੇੜਾ ਤੇ ਆਪਾ ਇਕ ਹੋਏ,

ਲੂੰ ਲੂੰ ਗਈ ਪਰੋਈ:

 

ਖੇੜਾ ਦਿਲ ਦਾ, ਖੇੜਾ ਤਨ ਦਾ,

ਖੇੜਾ ਸਰਵਰ ਵਾਲਾ,

ਸਭ ਖੇੜੇ ਇਕ ਰੂਪ ਹੋ ਗਏ,

ਖੇੜੇ ਭੰਨੀਆਂ ਪਾਲਾਂ।