ਹਸੂੰ ਹਸੂੰ ਓ ਕਰਦੀਆਂ ਆਈਆਂ

ਆਪ ਹਸਾਂਦੀਆਂ ਆਈਆਂ:

ਖਿੜੇ ਖਿੜੰਦੇ ਮੱਥੇ ਆਈਆਂ

ਖੇੜਾ ਨਾਲ ਲਿਆਈਆਂ।

 

ਮੁਖੜਾ ਮੁਖੜਾ ਚੰਦ ਚੰਦ ਹੈ

ਚੰਦ ਮੁਖ ਹੋਕੇ ਆਈਆਂ;

ਖਾਣ ਚੰਦਾਂ ਵਿਚੋਂ ਚੰਦ ਲਭਾਕੇ

ਚਿਹਰੇ ਚਾੜ੍ਹ ਲਿਆਈਆਂ,

 

ਗਗਨ ਮੰਡਲ ਇਕ ਚੰਦ ਕਾਰਨੇ

ਕੇਡਾ ਗਰਬ ਕਰੇਂਦਾ,

ਏਥੇ ਵੇਖੋ ਡਾਲ ਡਾਲ ਹੈ

ਚੰਦ ਚੰਦ ਛਬਿ ਦੇਂਦਾ!

ਇਕ ਰੰਗਾ ਉਹ ਚੰਦ ਅਸਮਾਨੀ-

ਨਾਲ ਦਾਗ਼ ਦੇ ਭਰਿਆ,

ਹਰ-ਰੰਗਾ ਹਰ ਰੌਣਕ ਏਥੇ

ਸੈ ਲਖ ਚੰਦਾ ਚੜਿਆ।

 

ਗੁਲਦਾਊਦੀਆਂ ਸਾਡੀਆਂ ਸਹੀਓ!

ਚੰਦ੍ਰ-ਮੁਖੋਂ ਬੜ੍ਹ ਚੜ੍ਹੀਆਂ,

ਦਰਸ਼ਨ ਕਾਰਨ ਚੰਦ ਅਕਾਸ਼ੀ

ਚੜ੍ਹ ਦੇਖੇ ਚੰਦ ਲੜੀਆਂ।