ਇਸ਼ਕ ਦੇ ਫੱਟ
ਰੋਗ ਇਸ਼ਕ ਦੇ ਜਿਸ ਤਨ ਲੱਗਦੇ,
ਨਹੀਂਓ ਇਸ਼ਕ ਦੇ ਫੱਟ ਸਹਾਰ ਹੁੰਦੇ।
ਇਸ਼ਕ ਝਨਾਂ ਤਾਂ ਆਸ਼ਿਕ ਤਰਦੇ ਨੇ,
ਕੱਚੇ ਘੜਿਆਂ ਤੇ ਕਦ ਪਾਰ ਹੁੰਦੇ ।
ਮੈਂ ਗਲੀ ਇਸ਼ਕ ਦੀ ਜਦ ਲੰਘਾਂ,
ਬੂਹਾ ਯਾਰ ਦਾ ਤੱਕਦਾ ਹਾਂ।
ਦੁਨੀਆ ਤਾਂ ਲੱਖ ਵਸਦੀ ਏ,
ਮੈਂ ਨਿਗ੍ਹਾ ਯਾਰ ਦੇ ਚਿਹਰੇ ਤੇ ਰੱਖਦਾ ਹਾਂ ।
ਰਾਤੀਂ ਵੇਲੇ ਉੱਠ-ਉੱਠ ਕੇ,
ਜਦ ਯਾਰ ਦਾ ਨਾਮ ਧਿਆਉਂਦੀਆਂ ਨੇ ।
ਇਹ ਅੱਖੀਆਂ ਫਿਰ ਆਪ ਮੁਹਾਰੇ,
ਦੀਦ ਯਾਰ ਦੀ ਚਾਹੁੰਦੀਆਂ ਨੇ ।
ਨਾ ਇਸ਼ਕ-ਇਸ਼ਕ ਤੂੰ ਆਖ ਦਿਲਾ,
ਇਸ਼ਕ ਦੇ ਰੋਗ ਅਵੱਲੇ ।
ਰੋਗ ਇਸ਼ਕ ਦਾ ਜਿਸ ਤਨ ਲੱਗਜੇ,
ਕੁਝ ਨਹੀਂ ਛੱਡਦਾ ਪੱਲੇ ।
ਕੀ ਕਰਨਾ ਕੰਮ ਦਵਾਵਾਂ ਨੇ,
ਜਿੱਥੇ ਇਸ਼ਕ ਨੇ ਡੰਗੀਆਂ ਮਾਰੀਆਂ ਨੇ ।
ਇਸ਼ਕ ਦੇ ਹੱਥੋਂ "ਦੀਪ ਸੋਨੀ" ਨੇ,
ਜਿੱਤਕੇ ਬਾਜ਼ੀਆਂ ਹਾਰੀਆਂ ਨੇ ।
