ਔਰਤਾਂ ਪਸ਼ੂ ਨਹੀਂ ਹੁੰਦੀਆਂ

ਕਿਸੇ ਸਾਊ ਜੇਹੀ ਕੁੜੀ ਦਾ ਰਿਸ਼ਤਾ ਚਾਹੀਦਾ,

ਜ਼ਿਆਦਾ ਉੱਚੀ ਨਾ ਬੋਲੇ,

ਘਰਦਾ ਮਰਦ ਜੇ ਛਿਟੀ ਵੀ ਚੁੱਕੇ ਤਾਂ

ਸਬਰ ਦੀ ਘੁੱਟ ਭਰ ਕਮਰੇ 'ਚ ਚਲੀ ਜਾਵੇ

ਹੱਸਦੀ ਆਂਢ ਗੁਆਂਢ ਨਾ ਸੁਣੇ

ਫੋਨ ਕੋਲ ਰੱਖਣ ਦਾ ਰੈਸਾ ਨਾ ਪਾਵੇ

ਨੈੱਟ ਵਰਤਣ ਵਾਲੀ ਨਾ ਹੋਵੇ

ਹਾਂ ਕੋਈ ਕਵਿੱਤਰੀ ਜਾਂ ਨਚਾਰ ਵੀ ਨਾ ਹੋਵੇ

ਰੋਟੀਆਂ ਪਕਾਵੇ, ਸਾਰਾ ਕੰਮ ਸਾਂਭ ਲਵੇ

ਜਿੱਥੇ ਉਹਦਾ ਮਰਦ ਆਖੇ ਉੱਥੇ ਹੀ ਖੜੇ

ਬੱਸ ਗਊ ਬਣਕੇ ਰਹੇ

ਹੋਰ ਨਹੀਂ ਕੁਛ ਚਾਹੀਦਾ

 

ਕੁੜੀ ਦੇ ਪਿਉ ਨੇ ਨੀਵੀਂ ਚੁੱਕ ਐਨਾ ਕੁ

ਜਵਾਬ ਦਿੱਤਾ,

“ਬਾਈ ਜੀ ਤੁਸੀਂ ਰਿਸ਼ਤੇ ਲਈ

ਗ਼ਲਤ ਘਰ ਆ ਗਏ

ਇੱਥੇ ਔਰਤਾਂ ਰਹਿੰਦੀਆਂ, ਪਸ਼ੂ ਨਹੀਂ ... "