ਫਿਰ ਤੋਂ ਨਰਮ ਹੋ ਗਏ ਨੇ

 

ਉਹੀ ਘਸੀ ਪਿਟੀ ਜ਼ਿੰਦਗੀ

ਉਹੀ ਭਾਰੇ ਭਾਰੇ ਸਾਹ

ਉਹੀ ਕਾਲਜੇ ਵਿੱਚ ਹੌਲ

ਤੇ ਉਹੀ ਮਰੇ ਮੁੱਕੇ ਚਾਅ

ਉਹੀ ਹੱਥ ਪਏ ਅੱਟਣ

ਉਹੀ ਪਾਟੀਆਂ ਅੱਡੀਆਂ

ਉਹੀ ਕੰਡਲੇ ਕੰਡਲੇ ਰਾਹ

ਤੇ ਉਵੇਂ ਅੱਖਾਂ ਟੱਡੀਆਂ

ਉਵੇਂ ਖੁਰਦੀਆਂ ਹੱਡੀਆਂ

ਪੂਰਨ ਤੌਰ 'ਤੇ ਮਰ ਗਈਆਂ

ਜੋ ਰੀਝਾਂ ਵੱਡੀਆਂ-ਵੱਡੀਆਂ

ਸਾਡਾ ਕਾਹਦਾ ਨਵਾਂ ਸਾਲ ਮੁਬਾਰਕ ਹੋਇਆ?

 

ਸਾਡਾ ਨਵਾਂ ਸਾਲ ਤਾਂ ਮੁਬਾਰਕ ਹੋਵੇ

ਜੇਕਰ ਮੇਰੇ ਸਲਤਨਤ ਦੀ ਰਾਣੀ

ਮੇਰੀ ਜ਼ਿੰਦਗੀ ਨੂੰ ਮੁਬਾਰਕ ਹੋਵੇ

ਜਿਵੇਂ ਮੋਈਆਂ ਰੀਝਾਂ ਸੁਫ਼ਨੇ ਚਾਅ

ਲੈ ਅਸੀਂ ਜੀ ਰਹੇ ਆਂ

ਜੇਕਰ ਉਸ ਨੂੰ ਵੀ ਬਿਰਹਾ ਅੱਗ 'ਚ

ਸੜਨ ਦੀ ਮੁਹਾਰਤ ਹੋਵੇ

ਜੇਕਰ ਮੇਰੇ ਨਾਮ ਦੀ ਵੀ

ਉਸ ਦੇ ਨਾਮ ਵਾਂਗਰ ਇਬਾਦਤ ਹੋਵੇ

ਕਾਸ਼ ਉਸ ਦੇ ਦਿਲ ਦੀ ਮੇਰੇ ਦਿਲ ਵਾਂਗਰ

ਇਸ਼ਕ ਦੀ ਜੰਗ 'ਚ ਸ਼ਹਾਦਤ ਹੋਵੇ

ਈਕਣ ਹੋਵੇ ਤਾਂ ਨਵਾਂ ਸਾਲ ਹੀ ਨਹੀਂ

ਮੈਂ ਹਰ ਦਿਨ ਨਵਾਂ ਸਾਲ ਸਮਝ ਮਨਾਵਾਂ