ਆਉ ਚਿੜੀਓ

ਆਉ ਚਿੜੀਓ ਨੀ ਸ਼ੋਰ ਮਚਾਓ

ਕਾਵਾਂ ਨੂੰ ਵੀ ਨਾਲ ਲੈ ਜਾਉ

ਸਹੀਆਂ ਹੋਰ ਨਾ ਜਾਣ ਪੀੜਾਂ

ਮੌਤ ਮੇਰੀ ਦਾ ਗੀਤ ਕੋਈ ਗਾਉ

 

ਸੂਰਜ ਤੋਂ ਪਹਿਲਾਂ ਖੁੱਲ੍ਹ ਜਾਏ

ਅੱਖ ਮਰਜਾਣੀ ਡੁੱਲ੍ਹ ਜਾਏ

ਉਹਦੀ ਯਾਦ ਸੰਭਾਲੀ ਫਿਰਦੇ ਆਂ

ਜਿਸਨੂੰ ਸਾਡੀ ਯਾਦ ਨਾ ਆਏ

 

ਨਬਜ਼ਾਂ 'ਚੋਂ ਪੀੜਾਂ ਵਹਿੰਦੀਆਂ ਨੇ

ਵਾਵਾਂ ਉਦਾਸੀਆਂ ਕਹਿੰਦੀਆਂ ਨੇ

ਤੇਰੇ ਫਿੱਕੜੇ ਦਾ ਹੁਣ ਕੀ ਜੀਣਾ

ਉਹਦੇ ਗੂੜੀਆਂ ਚੜ੍ਹੀਆਂ ਮਹਿੰਦੀਆਂ ਨੇ

 

ਅੱਜ ਉਸ ਦੀ ਡੋਲੀ ਉੱਠਣੀ ਏ

ਜਿੰਦ ਤੜਪ ਤੜਪ ਕੇ ਮੁੱਕਣੀ ਏ

ਤੇਰੇ ਹਿਜ਼ਰਾਂ ਦੀ ਧੁੱਪ ਤਿੱਖੀ 'ਚ

ਸਾਹਾਂ ਦੀ ਨਹਿਰ ਵੀ ਸੁੱਕਣੀ ਏ

 

ਮੇਰੇ ਘਰ ਉੱਤੋਂ ਲੜੀਆਂ ਲਾਹੋ

ਚਾਦਰ ਤੇ ਬਾਲਣ ਲੈ ਆਓ

ਮੈਂ ਆਖਰੀ ਵਾਰ ਉਸਨੂੰ ਵੇਖ ਆਵਾਂ

ਤੁਸੀਂ ਜਾਕੇ ਸ਼ਮਸ਼ਾਨ ਸਜਾਓ