ਪਟ ਕੇ ਭਾਖੜਾ ਕੱਢੀਆਂ ਨਹਿਰਾਂ, ਪਾਣੀ ਖਾਲ ਚਲਾਏ ।
ਮਿੰਟ ਮਿੰਟ ਤੇ ਹੋਵਣ ਝਗੜੇ, ਲੜਨੇ ਨੂੰ ਜੱਟ ਆਏ।
ਮਾਰ ਗੰਡਾਸਾ ਛੱਬੀ ਕਰਤੀ, ਕਚਹਿਰੀ ਕੇਸ ਚਲਾਏ ।
ਦਿਉਰਾ ਨਾ ਲੜ ਵੇ ਭਾਬੀ ਆਖ ਸੁਣਾਏ ।
ਚਿੜੀਆਂ ਉਡਾਵਾਂ ਨੀ ਮੈਂ, ਮਨੇ ਉਤੇ ਚੜ੍ਹ ਕੇ ।
ਅੱਖੀਆਂ 'ਚ ਯਾਦ ਮੇਰੇ ਮਾਹੀ ਵਾਲੀ ਰੜਕੇ ।
ਵਜਿਆ ਟਟਿਆਲਾ ਨੀ, ਉਹ ਤੋਪ ਵਾਂਗੂ ਖੜਕੇ ।
ਤੱਤੜੀ ਦਾ ਦਿਲ ਮੇਰਾ, ਨਾਲ ਪਿਆ ਧੜਕੇ ।
ਨਿੱਕਾ ਮੇਰਾ ਦਿਉਰ ਨੀ, ਸਕੂਲੋਂ ਆਇਆ ਪੜ੍ਹ ਕੇ ।
ਮਾਂ ਤੇਰੀ ਨਿੱਤ ਵੱਟੇ ਘੂਰੀਆਂ, ਅੱਖਾ ਰਹਿੰਦਾ ਸਹੁਰਾ ।
ਜੀਅ ਕਰਦੈਂ ਕੁਝ ਖਾ ਕੇ ਮਰਜਾਂ, ਜਾਂ ਫਿਰ ਪੀਵਾਂ ਮਹਰਾ ।
ਏਹ ਚੰਦਰੀ ਦੀ ਸ਼ਕਲ ਦੇਖ ਕੇ, ਮੈਨੂੰ ਪੈਂਦਾ ਦੌਰਾ ।
ਵੇ ਦੋਵੇਂ ਉਝ ਚਲੀਏ, ਮੈਂ ਤਿੱਤਲੀ ਤੇ ਭੋਰਾ ।
