ਜ਼ਿੰਮਾ ਹਰੇਕ ਵਿਅਕਤੀ ਦੇ ਉੱਪਰ ਹੈ, ਇਸ ਨੂੰ ਟਾਲਿਆ ਨਹੀਂ ਜਾ ਸਕਦਾ। ਇਸ ਨੂੰ ਕਿਸੇ ਉੱਤੇ ਟਾਲਿਆ ਨਹੀਂ ਜਾ ਸਕਦਾ। ਜੇ ਮਨੁੱਖ ਦੀ ਸਮਾਪਤੀ ਹੋਵੇਗੀ ਤਾਂ ਮੈਂ ਜ਼ਿੰਮੇਵਾਰ ਰਹਾਂਗਾ, ਤੁਸੀਂ ਜ਼ਿੰਮੇਵਾਰ ਰਹੋਗੇ। ਅਤੇ ਜੇ ਮਨੁੱਖ ਨੂੰ ਬਚਾਉਣਾ ਹੈ ਤਾਂ ਮੈਨੂੰ ਕੁਝ ਕਰਨਾ ਹੋਵੇਗਾ, ਤੁਹਾਨੂੰ ਕੁਝ ਕਰਨਾ ਹੋਵੇਗਾ।
ਇਹ ਤਿੰਨ ਛੋਟੀਆਂ-ਜਿਹੀਆਂ ਗੱਲਾਂ, ਜੇ ਥੋੜ੍ਹੇ-ਜਿਹੇ ਲੋਕ ਜ਼ਮੀਨ 'ਤੇ ਕਰਨ 'ਚ ਸਮਰੱਥ ਹੋ ਜਾਈਏ ਤਾਂ ਥੋੜ੍ਹੇ-ਜਿਹੇ ਦੀਵੇ ਜਗ ਜਾਣਗੇ ਹਨੇਰੇ ਵਿੱਚ। ਥੋੜ੍ਹੇ-ਜਿਹੇ ਪ੍ਰਕਾਸ਼ ਦੇ ਸੋਮੇ ਪੈਦਾ ਹੋ ਜਾਣਗੇ। ਅਤੇ ਤਦ ਇਕ ਦੀਵਾ ਜਗਦਾ ਹੈ ਤਾਂ ਦੂਜੇ ਬੁਝੇ ਹੋਏ ਦੀਵੇ ਦੇ ਪ੍ਰਾਣਾਂ ਵਿੱਚ ਵੀ ਜਾਗਣ ਦੀ ਖ਼ਾਹਿਸ਼ ਪੈਦਾ ਹੋਣ ਲੱਗਦੀ ਹੈ। ਅਤੇ ਜਦ ਇਕ ਦੀਵਾ ਜਗਦਾ ਹੈ ਤਾਂ ਉਸ ਦੀ ਰੌਸ਼ਨੀ ਵਿੱਚ ਅਨੇਕਾਂ ਦੀਵਿਆਂ ਨੂੰ ਜਗਣ ਦੀ ਪ੍ਰੇਰਣਾ ਮਿਲਣੀ ਸ਼ੁਰੂ ਹੋ ਜਾਂਦੀ ਹੈ।
ਈਸ਼ਵਰ ਕਰੇ, ਤੁਹਾਡੇ ਅੰਦਰ ਸੰਕਲਪ ਪੈਦਾ ਹੋਵੇ । ਈਸ਼ਵਰ ਕਰੇ, ਤੁਹਾਡੇ ਅੰਦਰ ਇਕ ਸਿਰਜਣਾਤਮਕ ਊਰਜਾ ਪੈਦਾ ਹੋਵੇ, ਤੁਹਾਡੇ ਅੰਦਰ ਇਕ ਪ੍ਰੇਮ ਪੈਦਾ ਹੋਵੇ। ਈਸ਼ਵਰ ਕਰੇ, ਤੁਹਾਡੇ ਅੰਦਰ ਉਸ ਪ੍ਰਾਰਥਨਾ ਦਾ ਜਨਮ ਹੋਵੇ ਜਿਸ ਨਾਲ ਅਸੀਂ ਇਕ ਨਵੀਂ ਤਰ੍ਹਾਂ ਦੀ ਦੁਨੀਆ ਬਣਾ ਸਕੀਏ। ਹੁਣ ਤਕ ਮਨੁੱਖ ਜਿਸ ਤਰ੍ਹਾਂ ਜੀਵਿਆ ਹੈ ਉਹ ਇਕਦਮ ਗਲਤ ਹੈ ਅਤੇ ਹੁਣ ਤਕ ਮਨੁੱਖ ਨੇ ਜੋ ਵੀ ਕੀਤਾ ਹੈ ਉਸ ਨਾਲ ਹਿੱਤ ਨਹੀਂ ਹੋਇਆ। ਬਿਲਕੁਲ ਹੀ ਇਕ ਵੱਡੀ ਕ੍ਰਾਂਤੀ ਵਿੱਚੋਂ ਗੁਜ਼ਰੇ ਬਿਨਾਂ ਕੋਈ ਮਾਰਗ ਨਹੀਂ ਹੈ। ਅਤੇ ਜੇ ਰਾਜਨੀਤਕਾਂ ਉੱਤੇ, ਰਾਜਨੇਤਾਵਾਂ ਉੱਤੇ ਗੱਲ ਛੱਡ ਦਿੱਤੀ ਗਈ ਤਾਂ ਦੁਨੀਆ ਡੁੱਬੇਗੀ, ਦੁਨੀਆ ਨੂੰ ਬਚਣ ਦਾ ਫਿਰ ਕੋਈ ਮਾਰਗ ਨਹੀਂ ਦਿਖਾਈ ਪੈਂਦਾ। ਲੇਕਿਨ ਇਕ-ਇਕ ਵਿਅਕਤੀ ਨੇ ਆਪਣੇ ਉੱਪਰ ਗੱਲ ਲਈ ਤਾਂ ਕੁਝ ਹੋ ਸਕਦਾ ਹੈ। ਇਹ ਆਸ ਕਰਦਾ ਹਾਂ ਕਿ ਕੁਝ ਹੋ ਸਕੇਗਾ। ਅਸੀਂ ਸਾਰੇ ਛੋਟੇ-ਛੋਟੇ ਲੋਕ ਵੀ ਉਸ ਵੱਡੇ ਕੰਮ ਦੇ ਭਾਈਵਾਲ ਬਣ ਸਕਦੇ ਹਾਂ!
ਮੇਰੀਆਂ ਇਹਨਾਂ ਗੱਲਾਂ ਨੂੰ ਇੰਨੇ ਪ੍ਰੇਮ ਤੇ ਸ਼ਾਂਤੀ ਨਾਲ ਸੁਣਿਆ ਹੈ ਉਸ ਤੋਂ ਬਹੁਤ-ਬਹੁਤ ਅਨੰਦਤ ਹਾਂ, ਅਤੇ ਅੰਤ ਵਿੱਚ ਸਭ ਦੇ ਅੰਦਰ ਬੈਠੇ ਪਰਮਾਤਮਾ ਨੂੰ ਪ੍ਰਣਾਮ ਕਰਦਾ ਹਾਂ, ਮੇਰੇ ਪ੍ਰਣਾਮ ਸਵੀਕਾਰ ਕਰਨਾ।
