ਮੈਂ ਉਹਨਾਂ ਨੂੰ ਮਿਲਣ ਗਿਆ। ਉਹਨਾਂ ਨੂੰ ਕੋਈ ਖ਼ਬਰ ਨਹੀਂ ਕੀਤੀ ਅਤੇ ਗਿਆ। ਮੈਂ ਖਿੜਕੀ ਵਿੱਚੋਂ ਦੇਖਿਆ, ਉਹ ਆਪਣੇ ਕਮਰੇ ਵਿੱਚ ਨੰਗੇ ਟਹਿਲ ਰਹੇ ਹਨ। ਕੱਪੜੇ ਲਾਹ ਦਿੱਤੇ ਹਨ, ਨਗਨ ਹੋ ਕੇ ਟਹਿਲ ਰਹੇ ਹਨ। ਮੈਂ ਜਾ ਕੇ ਦਰਵਾਜ਼ਾ ਖੜਕਾਇਆ। ਉਹਨਾਂ ਨੇ ਛੇਤੀ ਨਾਲ ਚਾਦਰ ਲਪੇਟ ਕੇ ਦਰਵਾਜ਼ਾ ਖੋਲ੍ਹ ਦਿੱਤਾ। ਮੈਂ ਉਹਨਾਂ ਤੋਂ ਪੁੱਛਿਆ, ਹੁਣੇ ਤੁਸੀਂ ਨਗਨ ਸੀ, ਫਿਰ ਇਹ ਚਾਦਰ ਕਿਉਂ ਓੜ੍ਹ ਲਈ? ਉਹਨਾਂ ਮੈਨੂੰ ਕਿਹਾ, ਮੈਂ ਹੌਲੀ-ਹੌਲੀ, ਨਗਨ ਸਾਧੂ ਹੋਣ ਦਾ ਅਭਿਆਸ ਕਰ ਰਿਹਾ ਹਾਂ । ਅਜੇ ਮੈਨੂੰ ਭੈ ਲੱਗਦਾ ਹੈ, ਇਸ ਲਈ ਇਕੱਲੇ ਵਿੱਚ ਨਗਨ ਹੋਣ ਦਾ ਅਭਿਆਸ ਕਰਦਾ ਹਾਂ, । ਫਿਰ ਹੌਲੀ-ਹੌਲੀ ਆਦੀ ਹੋ ਜਾਵਾਂਗਾ। ਮੈਂ ਉਹਨਾਂ ਨੂੰ ਕਿਹਾ, ਕਿਸੇ ਸਰਕਸ ਵਿੱਚ ਭਰਤੀ ਹੋ ਜਾਉ, ਕਿਉਂਕਿ ਨਗਨ ਹੋਣ ਦਾ ਅਭਿਆਸ ਕਰਕੇ ਜੋ ਆਦਮੀ ਨੰਗਾ ਹੋ ਜਾਏਗਾ, ਉਹ ਸਰਕਸ ਦੇ ਲਾਇਕ ਹੈ, ਸੰਨਿਆਸ ਦੇ ਲਾਇਕ ਨਹੀਂ ਹੈ। ਉਹਨਾਂ ਮਹਾਂਵੀਰ ਨੂੰ ਆਪਣਾ ਆਦਰਸ਼ ਬਣਾਇਆ ਹੋਇਆ ਹੈ ਅਤੇ ਉਹਨਾਂ ਨੂੰ ਖ਼ਿਆਲ ਹੈ ਕਿ ਮਹਾਂਵੀਰ ਨਗਨ ਹੋ ਗਏ, ਇਸ ਲਈ ਮੈਂ ਵੀ ਨਗਨ ਹੋ ਜਾਵਾਂ । ਮੈਂ ਉਹਨਾਂ ਨੂੰ ਕਿਹਾ; ਪਤਾ ਹੈ, ਮਹਾਂਵੀਰ ਨਗਨ ਅਭਿਆਸ ਕਰਕੇ ਨਹੀਂ ਹੋਏ ਸਨ। ਮਹਾਂਵੀਰ ਦੀ ਨਗਨਤਾ ਸਹਿਜ ਸੀ। ਇਕ ਸਮੇਂ, ਇਕ ਪ੍ਰਤੀਤੀ, ਇਕ ਸੰਭਾਵਨਾ ਉਹਨਾਂ ਦੇ ਅੰਦਰ ਉਦੈ ਹੋਈ। ਉਹਨਾਂ ਲਈ ਵੱਸਤਰ ਬੇਲੋੜੇ ਹੋ ਗਏ। ਉਹਨਾਂ ਨੂੰ ਯਾਦ ਵੀ ਨਾ ਰਿਹਾ ਕਿ ਵੱਸਤਰ ਪਹਿਨਣ। ਉਹ ਉਸ ਸਰਲਤਾ ਨੂੰ, ਉਸ ਨਿਰਦੋਸ਼ਤਾ ਨੂੰ ਪਹੁੰਚੇ, ਜਿਥੇ ਢਕਣ ਦਾ ਉਹਨਾਂ ਨੂੰ ਕੋਈ ਖ਼ਿਆਲ ਹੀ ਨਾ ਰਿਹਾ। ਵੱਸਤਰ ਛੁੱਟ ਗਏ। ਇਹ ਤਾਂ ਮੇਰੀ ਸਮਝ ਵਿੱਚ ਨਹੀਂ ਆਉਂਦਾ ਕਿ ਇਕ ਆਦਮੀ ਨਗਨ ਹੋਣ ਦਾ ਅਭਿਆਸ ਕਰਕੇ ਨਗਨ ਹੋ ਜਾਵੇ, ਉਸ ਦੀ ਨਗਨਤਾ ਬਹੁਤ ਦੂਜੀ ਹੋਵੇਗੀ। ਇਹ ਅਭਿਨੈ ਅਤੇ ਪਖੰਡ ਹੋਵੇਗਾ।

ਕਿਸੇ ਆਦਮੀ ਦੇ ਅੰਦਰ ਪ੍ਰੇਮ ਦਾ ਫੁਰਨਾ ਹੋਵੇ ਅਤੇ ਉਹ ਸਾਰੀ ਦੁਨੀਆ ਦੇ ਪ੍ਰੇਮ ਨਾਲ ਭਰ ਜਾਵੇ ਤੇ ਅਹਿੰਸਾ ਨਾਲ ਭਰ ਜਾਵੇ ਤਾਂ ਸਮਝ ਵਿੱਚ ਆਉਂਦਾ ਹੈ। ਲੇਕਿਨ ਇਕ ਆਦਮੀ ਚੇਸ਼ਟਾ ਕਰੇ, ਯਤਨ ਕਰੇ, ਅਭਿਆਸ ਕਰੇ ਅਹਿੰਸਕ ਹੋਣ ਦਾ, ਇਹ ਸਮਝ ਵਿੱਚ ਨਹੀਂ ਆਉਂਦਾ। ਸਾਡੀਆਂ ਜਿੰਨੀਆਂ ਚੇਸ਼ਟਾਵਾਂ ਦੂਜੇ ਨੂੰ ਦੇਖ ਕੇ ਹੋਣਗੀਆਂ, ਉਹ ਸਾਨੂੰ ਗ਼ਲਤ ਲੈ ਜਾਣਗੀਆਂ ਅਤੇ ਸਾਡੇ ਜੀਵਨ ਨੂੰ ਵਿਅਰਥ ਕਰ ਦੇਣਗੀਆਂ। ਇਸੇ ਵਜ੍ਹਾ ਕਰਕੇ ਆਮ ਬੰਦਾ ਵੀ ਉੱਨਾ ਅਸੰਤੁਸ਼ਟ ਤੇ ਅਸ਼ਾਂਤ ਨਹੀਂ ਹੁੰਦਾ, ਜਿੰਨਾ ਅਖੌਤੀ ਸਾਧੂ ਤੇ ਸੰਨਿਆਸੀ ਹੁੰਦੇ ਹਨ। ਉਹ ਸਾਰੇ ਪਾਗਲਪਣ ਵਿੱਚ ਲੱਗੇ ਹੋਏ ਹਨ। ਇਕ ਨਿਊਰੋਸਿਸ ਨੇ ਉਹਨਾਂ ਨੂੰ ਪਕੜਿਆ ਹੋਇਆ ਹੈ, ਕਿਸੇ ਦੂਜੇ ਆਦਮੀ ਜਿਹਾ ਹੋਣਾ ਹੈ। ਇਹ ਪਾਗ਼ਲਪਣ ਹੈ, ਇਹ ਸ਼ੁਦਾਅ ਹੈ। ਕਿਸੇ ਦੂਜੇ ਜਿਹੇ ਹੋਣ ਦੀ ਕੋਸ਼ਿਸ਼ ਬਿਲਕੁਲ ਪਾਗਲਪਣ ਹੈ। ਕਿਉਂਕਿ ਇਹ ਸਾਰੀ ਚੇਸ਼ਟਾ ਦਾ ਨਤੀਜਾ ਹੋਵੇਗਾ ਆਤਮਦਮਨ, ਇਸ ਦਾ ਅਰਥ ਹੋਵੇਗਾ ਰਿਪ੍ਰੇਸ਼ਨ, ਜੋ ਤੁਸੀਂ ਹੋ, ਉਸ ਨੂੰ ਦਬਾਉ ਅਤੇ ਜੋ ਤੁਸੀਂ ਨਹੀਂ ਹੋ, ਉਸ ਨੂੰ ਹੋਣ ਦੀ ਚੇਸ਼ਟਾ ਕਰੋ। ਇਕ ਵਿਅਕਤੀ ਆਪਣੇ ਹੀ ਹੱਥੀਂ ਨਰਕ ਵਿੱਚ ਪਹੁੰਚ ਜਾਂਦਾ ਹੈ। ਚੌਵੀ ਘੰਟੇ ਨਰਕ ਵਿੱਚ ਜੀਣ ਲੱਗਦਾ ਹੈ, ਜੋ ਹੈ ਉਸ ਦੀ ਨਿੰਦਿਆ ਕਰਦਾ ਹੈ, ਅਤੇ ਜੋ ਉਸ ਨੇ ਹੋਣਾ ਹੈ, ਉਸ ਦੀ ਚੇਸ਼ਟਾ ਕਰਦਾ ਹੈ।