ਈਸ਼ਵਰ ਕਰੇ, ਤੁਹਾਨੂੰ ਧਾਰਮਕ ਬਣਾਏ, ਤੁਸੀਂ ਅਖੌਤੀ ਧਰਮਾਂ ਤੋਂ ਮੁਕਤ ਹੋਵੋ ਅਤੇ ਧਾਰਮਕ ਬਣੋ । ਤੁਸੀਂ ਅਖੌਤੀ ਮੰਦਰ, ਸ਼ਿਵਾਲਾ ਅਤੇ ਮਸਜਿਦਾਂ ਤੋਂ ਮੁਕਤ ਹੋਵੋ ਅਤੇ ਧਾਰਮਕ ਬਣੋ। ਇਸ ਦੁਨੀਆ ਵਿੱਚ ਜੇ ਧਾਰਮਕ ਆਦਮੀ ਦਾ ਉਤਾਰਾ ਹੋ ਜਾਵੇ ਤਾਂ ਅਸੀਂ ਮਨੁੱਖ ਨੂੰ ਬਚਾਉਣ ਵਿੱਚ ਸਫਲ ਹੋ ਜਾਵਾਂਗੇ, ਨਹੀਂ ਤਾਂ ਥੋੜ੍ਹੇ ਹੀ ਦਿਨਾਂ ਵਿੱਚ ਸਾਰੇ ਮਸ਼ੀਨ-ਮਸ਼ੀਨਾਂ ਹੀ ਮਸ਼ੀਨਾਂ ਦਿਖਾਈ ਦੇਣਗੀਆਂ, ਕੋਈ ਆਦਮੀ ਕਿਤੇ ਦਿਖਾਈ ਨਹੀਂ ਪਏਗਾ। ਆਦਮੀ ਮਰ ਰਿਹਾ ਹੈ ਅਤੇ ਮਸ਼ੀਨਾਂ ਜੀਂਦੀਆਂ ਜਾ ਰਹੀਆਂ ਹਨ। ਹੌਲੀ-ਹੌਲੀ ਅਸੀਂ ਮਸ਼ੀਨਾਂ ਦੀ ਤਰ੍ਹਾਂ ਹੋ ਜਾਵਾਂਗੇ। ਅਤੇ ਇਹ ਸਭ ਤੋਂ ਵੱਡੀ ਦੁਰਘਟਨਾ ਹੋਵੇਗੀ। ਐਟਮ ਬੰਬ ’ਤੇ ਹਾਈਡ੍ਰੋਜਨ ਬੰਬ ਇੰਨੀਆਂ ਵੱਡੀਆਂ ਦੁਰਘਟਨਾਵਾਂ ਨਹੀਂ ਹਨ । ਜੇ ਉਹ ਡਿੱਗ ਪੈਣ ਤਾਂ ਕੋਈ ਹਰਜ ਨਹੀਂ ਹੈ ਉੱਨਾ। ਲੇਕਿਨ ਜੇ ਸਾਰੇ ਮਨੁੱਖ ਜੜ੍ਹ ਮਸ਼ੀਨਾਂ ਦੀ ਤਰ੍ਹਾਂ ਹੋ ਜਾਣ ਤਾਂ ਸਭ ਖ਼ਤਮ ਹੋ ਜਾਏਗਾ-ਪ੍ਰੇਮ ਤੇ ਸੁਹੱਪਣ ਅਤੇ ਸੱਚ ਤੇ ਸ਼ੁੱਭ, ਸਭ ਗਾਇਬ ਹੋ ਜਾਣਗੇ । ਇਹਨਾਂ ਸਭ ਦਾ ਜਨਮ ਚੇਤੰਨ ਦੇ ਵਿਕਾਸ ਨਾਲ ਹੁੰਦਾ ਹੈ।

ਜੜ੍ਹਤਾ ਨੂੰ ਨਾ ਆਉਣ ਦੇਣਾ ਆਪਣੇ ਅੰਦਰ ਅਤੇ ਚੇਤੰਨ ਨੂੰ ਵਿਕਸਿਤ ਕਰਨਾ। ਚੇਤੰਨ ਦੇ ਵਿਕਾਸ ਦਾ ਨਿਯਮ ਹੈ, ਮੌਨ ਨੂੰ, ਸ਼ੂਨਯ ਨੂੰ, ਧਿਆਨ ਨੂੰ, ਜਾਗਰੂਪਤਾ ਨੂੰ ਆਪਣੇ ਅੰਦਰ ਜੋ ਜਿੰਨਾ ਵਿਕਸਿਤ ਕਰਦਾ ਹੈ, ਉਹ ਉੱਨਾ ਮੌਨ ਨੂੰ ਪਹੁੰਚ ਜਾਂਦਾ ਹੈ। ਪਰਮਾਤਮਾ ਤੁਹਾਡੇ ਸਭ ਸ਼ਬਦ ਖੋਹ ਲਵੇ, ਪਰਮਾਤਮਾ ਤੁਹਾਡੇ ਸਾਰੇ ਵਿਚਾਰ ਖੋਹ ਲਵੇ, ਪਰਮਾਤਮਾ ਤੁਹਾਨੂੰ ਨਿਰੋਲ ਮੌਨ ਕਰ ਦੇਵੇ, ਨਿਰੀਹ ਕਰ ਦੇਵੇ, ਤੁਹਾਨੂੰ ਇਕਦਮ ਦਰਿੱਦਰ ਕਰ ਦੇਵੇ। ਤੁਹਾਡੀ ਆਤਮਾ ਇਕਦਮ ਦਰਿੱਦਰ ਹੋ ਜਾਵੇ ਵਿਚਾਰਾਂ ਤੋਂ ਤਾਂ ਤੁਸੀਂ ਇਕਦਮ ਭਰਪੂਰ ਹੋ ਜਾਉਗੇ। ਅਤੇ ਤੁਹਾਨੂੰ ਅਨੰਤ ਸੰਪਤੀ ਦੇ ਦੁਆਰ ਹਾਸਲ ਹੋ ਜਾਣਗੇ । ਇਹੀ ਪ੍ਰਾਰਥਨਾ ਕਰਦਾ ਹਾਂ । ਮੇਰੀਆਂ ਗੱਲਾਂ ਨੂੰ ਇੰਨੀ ਗਰਮੀ ਵਿੱਚ ਬੈਠ ਕੇ ਸੁਣਿਆ ਹੈ, ਇੰਨੇ ਪ੍ਰੇਮ ਨਾਲ, ਉਸ ਦੇ ਲਈ ਬਹੁਤ ਧੰਨਵਾਦੀ ਹਾਂ । ਸਭ ਦੇ ਅੰਦਰ ਬੈਠੇ ਹੋਏ ਪਰਮਾਤਮਾ ਨੂੰ ਮੇਰਾ ਪ੍ਰਣਾਮ ਸਵੀਕਾਰ ਕਰਨਾ।