ਜਾਏ, ਕਿੰਤੂ ਬਹੁਤ ਸਾਰੀ ਵਿਚਾਰ ਦੇ ਮਗਰੋਂ ਫ਼ੈਸਲਾ ਹੋਇਆ ਕਿ ਰੋਪੜ ਦੇ ਮੁਕਾਮ ਤੇ ਮੁਲਾਕਾਤ ਕੀਤੀ ਜਾਏ। ਹੁਣ ਇਹ ਗੱਲ ਦੁਹਾਂ ਪਾਸਿਆਂ ਤੋਂ ਤੈਅ ਹੋ ਕੇ ਪੱਕੀ ਹੋ ਗਈ ਕਿ ਰੋਪੜ ਵਿੱਚ ਦੋਨੋਂ ਸਰਕਾਰਾਂ ਦਾ ਮੇਲ ਹੋਵੇ।

ਮਹਾਰਾਜਾ ਨੇ ਜਿਨ੍ਹਾਂ ਫੌਜਾਂ ਨੂੰ ਨਾਲ ਲੈ ਜਾਣਾ ਸੀ, ਓਹਨਾਂ ਨੂੰ ਹੁਕਮ ਹੋਇਆ ਕਿ ਨਈ ਵਰਦੀਆਂ ਤੇ ਸੁੰਦਰ ਹਥ੍ਯਾਰ ਦਿੱਤੇ ਜਾਣ। ਉਧਰ ਗਵਰਨਰ ਜਨਰਲ ਨੇ ਵੀ ਆਪਣੀਆਂ ਹੇਠ ਲਿਖੀਆਂ ਫੌਜਾਂ ਨੂੰ ਹੁਕਮ ਦਿੱਤਾ ਕਿ ਆਪਣੇ ਅਸਥਾਨ ਤੋਂ ਚੱਲ ਕੇ ਰੋਪੜ ਇਕੱਠੀਆਂ ਹੋਣ:

ਦੋ ਦਸਤੇ ਯੂਰਪੀਨ ਨੇਜ਼ੇ ਵਾਲਿਆਂ ਦੇ, ਸੋਲ੍ਹਵਾਂ ਸ਼ਾਹੀ ਰਸਾਲਾ, ਇੱਕ ਰਜਮਟ ਗੋਰਾ ਪਲਟਨ ਦੀ, ਦੋ ਤੋਪਖਾਨੇ ਘੋੜਿਆਂ ਦੇ ਤੇ ਦੋ ਦਸਤੇ ਸਕਨਰ ਸਾਹਿਬ ਦੇ ਸਵਾਰਾਂ ਦੇ।

ਦੋਹਾਂ ਧਿਰਾਂ ਵੱਲੋਂ ਤਿਆਰੀਆਂ ਹੋ ਕੇ ਸਜਾਵਟ ਦਾ ਸਮਾਨ ਰੋਪੜ ਪੁੱਜ ਗਿਆ। ਸਤਲੁਜ ਤੋਂ ਪਾਰ ਗਵਰਨਰ ਦਾ ਖੇਮਾ ਲੱਗ ਗਿਆ ਤੇ ਇਸ ਪਾਸੇ ਕਾਠਗੜ੍ਹ ਵਿੱਚ ਜੋ ਰੋਪੜ ਦੇ ਠੀਕ ਸਾਹਮਣੇ ਹੈ, ਮਹਾਰਾਜੇ ਦਾ ਕੈਂਪ ਲੱਗਾ। ੧੯ ਅਕਤੂਬਰ ੧੮੩੧ ਨੂੰ ਗਵਰਨਰ ਜਨਰਲ ਸ਼ਿਮਲੇ ਤੋਂ ਚੱਲ ਕੇ ੨੨ ਨੂੰ ਰੋਪੜ ਪੁੱਜੇ। ਇਧਰ ਮਹਾਰਾਜਾ ਸਾਹਿਬ ਵੀ ੧੮੮੮ ਬਿ. ੨੨ ਭਾਦੋਂ ਨੂੰ ਲਾਹੌਰ ਤੋਂ ਚੱਲ ਕੇ ਅੰਮ੍ਰਿਤਸਰ ਆਏ। ਇੱਥੇ ਕਪਤਾਨ ਵੈੱਡ ਸਾਹਿਬ ਮਹਾਰਾਜੇ ਦੇ ਸਵਾਗਤ ਲਈ ਗਵਰਨਰ ਜਨਰਲ ਵੱਲੋਂ ਆਏ। ਮਹਾਰਾਜਾ ਅੱਸੂ ਦਾ ਸਾਰਾ ਮਹੀਨਾ ਸ੍ਰੀ ਅੰਮ੍ਰਿਤਸਰ ਜੀ ਰਹੇ। ਦੁਸਹਿਰੇ ਦਾ ਦਰਬਾਰ ਰਾਮ ਬਾਗ਼ ਵਿੱਚ ਬੜੀ ਧੂਮ ਧਾਮ ਨਾਲ ਕਰ ਕੇ ਇੱਥੋਂ ਬੜੀ ਸਜ ਧਜ ਨਾਲ ਚੱਲ ਕੇ ੧੧ ਕੱਤਕ ਨੂੰ ਰੋਪੜ ਦੇ ਸਾਹਮਣੇ ਕਾਠਗੜ੍ਹ ਆਪਣੇ ਖੇਮੇ ਵਿੱਚ ਜਾ ਬਿਰਾਜੇ। ਉਸ ਵੇਲੇ ਮਹਾਰਾਜਾ ਸਾਹਿਬ ਦੇ ਨਾਲ ੧੦ ਹਜ਼ਾਰ ਯੋਧੇ, ੬ ਹਜ਼ਾਰ ਪਿਆਦਾ ਤੇ ਦੋ ਤੋਪਖਾਨੇ ਸਨ। ਜਿਸ ਰਾਹ ਤੋਂ ਮਹਾਰਾਜੇ ਦੀ ਫੌਜ ਲੰਘਦੀ ਸੀ, ਵੇਖਣ ਵਾਲੇ ਦੰਗ ਰਹਿ ਜਾਂਦੇ ਸਨ। ਜਿਸ ਵੇਲੇ ਮਹਾਰਾਜਾ ਸਾਹਿਬ ਆਪਣੇ ਖੇਮੇ ਵਿੱਚ ਪੁੱਜੇ, ਮੇਜਰ ਜਨਰਲ ਅਨਰੀ ਸਾਹਿਬ ਤੇ ਗਵਰਨਰ ਜਨਰਲ ਸਾਹਿਬ ਬਹਾਦਰ ਦੇ ਚੀਫ ਸਕੱਤਰ ਹੋਰ ਦੋ ਤਿੰਨ ਵੱਡੇ ਅੰਗਰੇਜ਼ ਅਫਸਰਾਂ ਸਮੇਤ ਗਵਰਨਰ ਜਨਰਲ ਵੱਲੋਂ ਸੁੱਖ ਸਾਂਦ ਪੁੱਛਣ ਤੇ ਰਾਹ ਦੇ ਕਸ਼ਟਾਂ ਲਈ ਖਿਮਾਂ ਮੰਗਣ ਵਾਸਤੇ ਆਏ ਤੇ ਮਿਲ ਕੇ ਚਲੇ ਗਏ। ਫਿਰ ਮਹਾਰਾਜਾ ਸਾਹਿਬ ਨੇ ਸ਼ਾਹਜ਼ਾਦਾ ਖੜਗ ਸਿੰਘ ਨੂੰ ਗਵਰਨਰ ਜਨਰਲ ਪਾਸ ਮਿਲਣ ਵਾਸਤੇ ਭੇਜਿਆ। ਜੀਂਦਾ ਦਾ ਰਾਜਾ ਸੰਗਤ ਸਿੰਘ, ਰਾਜਾ ਗੁਲਾਬ ਸਿੰਘ, ਸਰਦਾਰ ਸ਼ਾਮ ਸਿੰਘ ਅਟਾਰੀ ਵਾਲਾ, ਸਰਦਾਰ ਹਰੀ ਸਿੰਘ ਨਲੂਆ ਤੇ ਸਰਦਾਰ ਅਤਰ ਸਿੰਘ ਸੰਧਾਵਾਲੀਆ ਨੂੰ ਸ਼ਾਹਜ਼ਾਦਾ ਸਾਹਿਬ ਦੇ ਨਾਲ ਭੇਜਿਆ। ਸਕੱਤਰ ਸਾਹਿਬ ਤੇ ਸੈਨਾਪਤੀ ਨੇ ਕੁਝ ਕਦਮ ਅੱਗੇ ਵੱਧ ਕੇ ਸ਼ਾਹਜ਼ਾਦੇ ਦਾ ਸਵਾਗਤ ਕੀਤਾ ਤੇ ਬੜੀ ਇੱਜ਼ਤ ਨਾਲ ਸ਼ਾਹਜ਼ਾਦੇ ਨੂੰ ਗਵਰਨਰ ਜਰਨਲ ਦੇ ਕੈਂਪ ਵਿੱਚ ਲੈ ਗਏ। ਓਥੋਂ ਗਵਰਨਰ ਜਨਰਲ ਨੇ ਉੱਠ ਕੇ ਹੱਥ ਮਿਲਾਇਆ ਤੇ ਬੜੀ ਇੱਜ਼ਤ ਦੇ ਨਾਲ ਆਪਣੇ ਸੱਜੇ ਹੱਥ ਬਠਾਇਆ ਤੇ ਸੁੱਖ ਸਾਂਦ ਪੁੱਛੀ ਤੇ ਮਹਾਰਾਜਾ ਸਾਹਿਬ ਦਾ ਇੰਨੀ ਖੇਚਲ ਉਠਾਣ ਦਾ ਧੰਨਵਾਦ ਕੀਤਾ। ਸ਼ਾਹਜ਼ਾਦਾ ਸਾਹਿਬ ਤੇ ਇਨ੍ਹਾਂ ਦੇ ਸਾਥੀਆਂ ਨੇ ਵੀ ਬੜੀ ਯੋਗਤਾ ਦਾ ਉੱਤਰ ਦਿੱਤਾ। ਹਰ ਇੱਕ ਨੇ ਯਾਰਾਂ ਯਾਰਾਂ ਸੌ ਰੁਪਯਾ ਗਵਰਨਰ ਦੇ ਸਿਰ ਤੋਂ ਸਿਰ ਵਾਰਨਾ ਕੀਤਾ ਤੇ ਯਥਾ ਯੋਗ ਸਿਰੋਪਾ ਲੈ ਕੇ ਚਲੇ ਆਏ ਤੇ ੨੬ ਅਕਤੂਬਰ ਨੂੰ ਸ਼ਾਮ ਮਹਾਰਾਜਾ ਸਾਹਿਬ ਨਾਲ ਮਿਲਣ ਦਾ ਦਿਨ ਨੀਯਤ ਹੋਇਆ।

ਇਸ ਸਮੇਂ ਕਿਸੇ ਨੇ ਮਹਾਰਾਜਾ ਸਾਹਿਬ ਦੇ ਦਿਲ ਵਿਚ ਸ਼ੱਕ ਪਾ ਦਿੱਤਾ ਕਿ ਅੰਗਰੇਜ਼ ਤੁਹਾਡੇ ਨਾਲ ਧੋਖਾ ਕਰ ਰਹੇ ਹਨ, ਤੁਸਾਂ ਜੋ ਓਹਨਾਂ ਦੀ ਸਰਹੱਦ ਤੇ ਆ ਕੇ ਮਿਲਣ ਦਾ ਫ਼ੈਸਲਾ ਕੀਤਾ ਹੈ, ਬੜੀ ਉਕਾਈ ਕੀਤੀ ਹੈ। ਜੇ ਗਵਰਨਰ ਨੇ ਮਿਲਣਾ ਹੈ, ਤਦ ਅੰਮ੍ਰਿਤਸਰ ਆ ਕੇ ਤੁਹਾਨੂੰ ਮਿਲੇ: ਹਾਲੀ ਮੁਲਾਕਾਤ ਰੋਕ ਦਿੱਤੀ ਜਾਏ। ਰਾਤ ਨੂੰ ਜਨਰਲ ਅਲਾਰਡ ਨੂੰ ਮਹਾਰਾਜਾ ਸਾਹਿਬ ਨੇ ਬੁਲਾ ਕੇ ਕਿਹਾ ਕਿ ਕੱਲ੍ਹ ਦਾ ਦਿਨ ਮੁਲਾਕਾਤ ਨਾ ਹੋਵੇ। ਜਨਰਲ ਨੇ ਬੜੀ ਧੀਰਜ ਨਾਲ ਮਹਾਰਾਜਾ ਸਾਹਿਬ ਨੂੰ ਤਸੱਲੀ ਦਿੱਤੀ ਕਿ ਕੋਈ ਚਿੰਤਾ ਨਾ ਕਰੋ, ਮੁਲਾਕਾਤ ਵਿੱਚ ਕੋਈ