ਗੁੰਲਦਸਤਾ
ਓ ਮਾਲੀ ਫੁਲ ਸਜਾਂਦਾ ਜਾ,
ਇਹ ਬਾਗ ਬਹਿਸ਼ਤ ਬਣਾਂਦਾ ਜਾ ।
ਤੈਨੂੰ ਇਹ ਕਿਸ ਨੇ ਦੱਸਿਆ ਸੀ,
ਭਰਮਾਂ ਦੇ ਜਾਲ ਵਿਛਾਂਦਾ ਜਾ ?
ਮੁਰਸ਼ਦ ਵੀ ਆਸ਼ਕ ਬਣ ਜਾਵੇ,
ਬੁੱਲ੍ਹੇ ਦੇ ਵਾਕਰ ਗਾਂਦਾ ਜਾ ।
ਮਾਲੀ ਨਾ ਤੋੜੀਂ ਕੰਡਿਆਂ ਨੂੰ,
ਕੰਡਿਆਂ ਦੇ ਫੁਲ ਬਣਾਂਦਾ ਜਾ ।
ਇਹ ਹੱਕ ਕਿਵੇਂ ਤੂੰ ਲੀਤਾ ਪਈ,
ਅੰਮ੍ਰਿਤ ਵਿਚ ਜ਼ਹਿਰ ਮਿਲਾਂਦਾ ਜਾ ।
ਮੈਂ ਸੂਰ ਦਾਸ ਬਣਨਾ ਹੀ ਨਹੀਂ,
ਸਾਮਰਤੱਖ ਚੋਲ੍ਹ ਦਿਖਾਂਦਾ ਜਾ ।
ਹਰ ਤਾਰੇ ਦਾ ਮੁਲ ਪਾਉਣਾ ਹੈ,
ਪੁੰਨਿਆ ਨੂੰ ਰਾਜ਼ ਸੁਝਾਂਦਾ ਜਾ ।
ਜੇ ਅਰਸ਼ਾਂ ਉੱਤੇ ਰਹਿਣਾ ਈਂ,
ਫਰਸ਼ਾਂ ਦੇ ਭੇਦ ਸੁਣਾਂਦਾ ਜਾ ।
ਹਰ ਵਿਚੋਂ ਰੂਪ ਦੇਖਾ ਪਹਿਲਾਂ,
ਪਿਛੋਂ ਹਰ ਵਿਚ ਸਮਾਂਦਾ ਜਾ।
