ਪੁਲਸ ਦੇ ਸਿਪਾਹੀ ਨੂੰ

ਮੈਂ ਪਿੱਛੇ ਛੱਡ ਆਇਆ ਹਾਂ

ਸਮੁੰਦਰ ਰੋਂਦੀਆਂ ਭੈਣਾਂ

ਕਿਸੇ ਅਣਜਾਣੇ ਭੈਅ ਅੰਦਰ

ਜਰਕਦੀ ਬਾਪ ਦੀ ਦਾਹੜੀ

ਤੇ ਸੁੱਖਣਾ ਸੁੱਖਦੀ,

ਖਾਂਦੀ ਗਸ਼ਾਂ ਮਾਸੂਮ ਮਮਤਾ ਨੂੰ

ਮੇਰੇ ਖੁਰਲੀ 'ਤੇ ਬੱਧੇ ਹੋਏ

ਡੰਗਰਾਂ ਬੇਜ਼ੁਬਾਨਾਂ ਨੂੰ

ਕਿਸੇ ਛਾਵੇਂ ਨਹੀਂ ਬੰਨ੍ਹਣਾ

ਕਿਸੇ ਪਾਣੀ ਨਹੀਂ ਡਾਹੁਣਾ,

ਤੇ ਮੇਰੇ ਘਰ ਕਈ ਡੰਗ

ਸੋਗ ਵਿੱਚ ਚੁੱਲ੍ਹਾ ਨਹੀਂ ਬਲਣਾ ।

 

ਸਿਪਾਹੀਆ ਦੱਸ, ਮੈਂ ਤੈਨੂੰ ਵੀ

ਏਡਾ ਖ਼ਤਰਨਾਕ ਦੀਹਦਾਂ ?

ਭਰਾਵਾ ਸੱਚ ਦੱਸ, ਤੈਨੂੰ

ਮੇਰੀ ਉੱਧੜੀ ਹੋਈ ਚਮੜੀ

ਤੇ ਮੇਰੇ ਮੂੰਹ 'ਚੋਂ ਵਗਦੇ ਲਹੂ 'ਚ

ਕੁਝ ਆਪਣਾ ਨਹੀਂ ਦਿਸਦਾ ?

 

ਤੂੰ ਲੱਖ ਦੁਸ਼ਮਣ ਕਤਾਰਾਂ ਵਿੱਚ

ਹੁੱਬ ਕੇ ਮਾਰ ਲੈ ਸ਼ੇਖੀ

ਤੇਰੇ ਨੀਂਦਰ-ਪਿਆਸੇ ਨੈਣ

ਤੇ ਪਥਰਾ ਗਿਆ ਮੱਥਾ,

ਤੇਰੀ ਪਾਟੀ ਹੋਈ ਨਿੱਕਰ

ਤੇ ਉਸ ਦੀ ਜੇਬ ਵਿੱਚ ਰਚ ਗਈ

ਜ਼ਹਿਰੀਲੀ ਬੋਅ ਤਮਾਕੂ ਦੀ

ਨੇ ਤੇਰੀ ਖਾ ਰਹੇ ਚੁਗਲੀ।