3
ਦਿਨ ਦਾ ਸੂਰਜ ਬਣ ਕੇ ਰਾਤ ਦਾ ਚੰਨ ਵਿਖਾ।
ਸ਼ੀਸ਼ੇ ਨਾਲੋਂ ਸੁਹਣਾ ਆਪਣਾ ਮਨ ਵਿਖਾ।
ਸੂਈ ਦਾ ਨੱਕਾ ਭਰ ਨਾ ਸਕਦਾ ਤੇਰੀ ਮੈਲ,
ਫੁੱਲਾਂ ਵਾਂਗੂੰ ਧੋ ਕੇ ਆਪਣਾ ਤਨ ਵਿਖਾ।
ਜਿਹਨਾਂ ਆਪਣੇ ਸਿਰ ਨੇ ਵਾਰੇ ਅਣਖਾਂ ਤੋਂ,
ਉਹਨਾਂ ਲੋਕਾਂ ਵਰਗੀ ਆਪਣੀ ਫਨ ਵਿਖਾ।
ਤੇਰੇ ਬੁੱਲ੍ਹ, ਨਈਂ ਹਿੱਲੇ ਭਰਦੀਆਂ ਚੀਕਾਂ ਤੇ,
ਵੈਦ ਕਿਸੇ ਨੂੰ ਸੱਜਣਾ ਆਪਣੇ ਕੰਨ ਵਿਖਾ।
ਸੱਚੇ ਮੁਨਸਿਫ ਅਜੇ ਨਈਂ ਬੈਠੇ ਕੁਰਸੀ ਤੇ,
ਗੱਲੀਂ ਨਾ ਫਨਕਾਰਾ ਆਪਣਾ ਫਨ ਵਿਖਾ।
ਮੈਂ ਵੀ ਕੱਲ੍ਹ ਦੀ ਛੁੱਟੀ ਕਰ ਕੇ ਵੇਖ ਲਵਾਂ,
ਮੇਰੇ ਪੀਪੇ ਵਿੱਚ ਵੀ ਏਨਾ ਅੰਨ ਵਿਖਾ।
ਆਪਣੀ ਲੈ ਮਜ਼ਦੂਰੀ 'ਬਾਬਾ' ਆਕੜ ਕੇ,
ਕੁੜਤਾ ਲਾਹ ਕੇ ਮੋਢੇ ਦਾ ਨਾ ਕੰਨ੍ਹ ਵਿਖਾ।
-0-
