4
ਕਾਨੇ ਉੱਤੇ ਟੰਗੇ ਰਹਿ ਗਏ ਮੇਰਾ ਹਾਰ,
ਲੋਕੀਂ ਆਪਣੇ ਪੱਥਰ ਵੇਚ ਕੇ ਟੁਰ ਗਏ ਨੇ।
ਮੈਥੋਂ ਪਹਿਲਾਂ ਕਈ ਫਨਕਾਰ ਜ਼ਮਾਨੇ ਦੇ,
ਮਜਬੂਰੀ ਤੋਂ ਅੱਖਰ ਵੇਚ ਕੇ ਟੁਰ ਗਏ ਨੇ।
ਕਿਹੜੇ ਖਾਤੇ ਲਿੱਖਾਂ ਨਾਂ ਮੈਂ ਉਹਨਾਂ ਦਾ,
ਜਿਹੜੇ ਆਪਣੇ ਟੱਬਰ ਵੇਚ ਕੇ ਟੁਰ ਗਏ ਨੇ।
ਮੰਨਾ ਕਿਸਰਾਂ ਮੈਂ ਉਹਨਾਂ ਦੀ ਵਾਹੀ ਨੂੰ,
ਜਿਹੜੇ ਹਾਲੀ ਡੰਗਰ ਵੇਚ ਕੇ ਟੁਰ ਗਏ ਨੇ।
ਕਿਹੜੀ ਕਾਲਖ ਮੱਥੇ ਲੱਗੀ ਉਹਨਾਂ ਦੇ,
ਲੰਬੜ ਆਪਣਾ ਨਗਰ ਵੇਚ ਕੇ ਟੁਰ ਗਏ ਨੇ।
ਸ਼ਹਿਰ 'ਚ ਮੇਰਾ ਰੱਤੀ ਸ਼ਹਿਦ ਵੀ ਟਿਕਣਾ ਨਈਂ,
ਉਹ ਭੂੰਡਾਂ ਦੀ ਖੱਖਰ ਵੇਚ ਕੇ ਟੁਰ ਗਏ ਨੇ।
-0-
