25
ਤਗੜੇ ਅੱਗੇ ਮਾੜੇ ਇੱਕ ਦਿਨ ਬੋਲਣਗੇ।
ਭਾਂਬੜ ਬਣ ਕੇ ਇਹ ਚੰਗਿਆੜੇ ਬੋਲਣਗੇ।
ਤੌਬਾ ਤੌਬਾ ਕਰਨਗੇ ਵਾਸੀ ਅੰਬਰਾਂ ਦੇ,
ਇਸ ਧਰਤੀ ਦੇ ਜਦੋਂ ਲਤਾੜੇ ਬੋਲਣਗੇ।
ਚੰਬੜ ਗਏ ਨੇ ਨੇਰ੍ਹੇ ਘਰ ਦੀਆਂ ਕੰਧਾਂ ਨੂੰ,
ਘਰ ਦੇ ਦੀਵੇ ਕਿਹੜੇ ਦਿਹਾੜੇ ਬੋਲਣਗੇ।
ਏਹੋ ਜਹੇ ਵੀ ਸੱਚੇ ਕਿਧਰੇ ਹੈਗੇ ਨੇ,
ਸੂਲੀ ਦੇ ਵੀ ਚੜ੍ਹ ਕੰਧਾੜੇ ਬੋਲਣਗੇ।
ਕੋਈ ਵੀ ਤੇਰੇ ਨਾਲ ਜਦੋਂ ਨਾ ਬੋਲੇਗਾ,
ਮੇਰੇ ਜਿਹੜੇ ਖਤ ਨੇ ਸਾੜੇ, ਬੋਲਣਗੇ ।
ਦੇਣਾ ਦਾਜ, ਨਾ ਲੈਣਾ ਮੈਨੂੰ ਲਗਦਾ ਏ,
ਮੇਰੀ ਨਵੀਂ ਨਸਲ ਦੇ ਲਾੜੇ ਬੋਲਣਗੇ।
ਮੈਨੂੰ ਵੀ ਏ ਤੱਕਿਆ ਲੋਕਾਂ, ਤੈਨੂੰ ਵੀ,
ਸ਼ੀਸ਼ੇ ਕੀਹਨੇ ਪੱਥਰ ਝਾੜੇ ਬੋਲਣਗੇ।
-0-
