26
ਏਹੋ ਜਹੀ ਕਮਜ਼ੋਰ ਹਕੂਮਤ 'ਬਾਬਾ' ਜੀ।
ਵੇਖੀ ਨਈਂ ਕੋਈ ਹੋਰ ਹਕੂਮਤ ਬਾਬਾ ਜੀ।
ਪਿਛਲੀ ਨਾਲ ਵੀ ਸਾਡਾ ਏਹੋ ਰੌਲਾ ਸੀ,
ਇਹ ਵੀ ਪੱਕੀ ਚੋਰ ਹਕੂਮਤ ਬਾਬਾ ਜੀ।
ਚਲੋ ਆਖੀਏ ਖਾਕੀ ਵਰਦੀ ਵਾਲੇ ਨੂੰ,
ਕਰਦੀ ਪਈ ਏ ਬੋਰ ਹਕੂਮਤ ਬਾਬਾ ਜੀ।
ਕੁਝ ਦਿਨਾਂ ਦੀ ਇਹ ਵੀ ਪਰਾਹੁਣੀ ਲਗਦੀ ਏ,
ਚੱਲੇ ਜਿਹੜੀ ਟੋਰ ਹਕੂਮਤ ਬਾਬਾ ਜੀ।
ਮਰ ਨਈਂ ਜਾਣਾ ਲੋਕਾਂ ਨਾਲ ਮਹਿੰਗਾਈ ਦੇ,
ਆਪਣੀ ਖੋਦੇ ਗੋਰ* ਹਕੂਮਤ ਬਾਬਾ ਜੀ।
ਚੌਧਰੀ, ਖਾਨ ਵਡੇਰੇ ਮੈਂ ਅਜ਼ਮਾ ਲਏ ਨੇ,
ਆਵੇ ਨਵੀਂ ਨਿਕੋਰ ਹਕੂਮਤ ਬਾਬਾ ਜੀ।
ਸਾਨੂੰ ਲੱਗੇ ਭੈੜੀ, ਗਿਰਝਾਂ, ਚੀਲਾਂ ਤੋਂ,
ਬਣ ਬਣ ਦੱਸੇ ਮੋਰ, ਹਕੂਮਤ ਬਾਬਾ ਜੀ।
ਨਿੱਤ ਸਵੇਰੇ ਸਾਡੀ ਝੋਲੀ ਪਾਉਂਦੀ ਏ,
ਮਸਲਾ ਨਵਾਂ ਨਿਕੋਰ, ਹਕੂਮਤ ਬਾਬਾ ਜੀ।
(ਗੋਰ* = ਕਬਰ)
-0-
