32
ਅਸਲੇ ਨਾਲੋਂ ਆਪਣੀ ਪੈਦਾਵਾਰ ਵਧਾਈਏ ਚੰਗਾ ਏ।
ਤੇਸੀ, ਕਾਂਡੀ, ਰੰਬੇ, ਕਹੀ ਦੀ ਧਾਰ ਵਧਾਈਏ ਚੰਗਾ ਏ।
ਲਾਸ਼ਾਂ ਬਾਝੋਂ ਕੁਝ ਨਈਂ ਦੇਣਾ 'ਪ੍ਰਿਥਵੀ' ਸਾਨੂੰ 'ਗੌਰੀ' ਨੇ,
ਇਹਨਾਂ ਨਾਲੋਂ ਫੁੱਲਾਂ ਦੀ ਮਹਿਕਾਰ ਵਧਾਈਏ ਚੰਗਾ ਏ।
ਮੈਨੂੰ ਸ਼ਹਿਰ ਵਿਖਾਲੀ ਦੇਂਦੇ ਆਪਣੇ ਵੀ ਬੇਗਾਨੇ ਵੀ,
ਜਿਹੜੇ ਆਖਣ ਆਪਣੇ ਖਿਦਮਤਗਾਰ ਵਧਾਈਏ ਚੰਗਾ ਏ।
ਨਵੀਆਂ ਨਸਲਾਂ ਭੰਗੜੇ ਪਾਵਣ ਵੇਖ ਕੇ ਆਪਣੇ ਵਿਰਸੇ ਨੂੰ,
ਉੱਚੇ ਕਰੀਏ ਕੋਠੇ, ਕਾਰੋਬਾਰ ਵਧਾਈਏ ਚੰਗਾ ਏ।
ਚੁੱਕ ਕੇ ਸਿਰ ਜੇ ਮੱਥੇ ਲੱਗਣਾ, ਇੱਕੀਵੀਂ ਸਦੀ ਦੇ ਬਾਬਾ ਜੀ,
ਹਿੰਮਤ ਕਰ ਕੇ ਆਪਣੀ ਹੁਣ ਰਫਤਾਰ ਵਧਾਈਏ ਚੰਗਾ ਏ।
-0-
