33
ਘੁੱਗੂ ਘੋੜੇ ਵੇਚਣ ਵਾਲੇ ਮੇਲੇ ਵਿੱਚੋਂ ਵੱਟਣਾ ਕੀ?
ਉੱਤਰ ਵਿੱਚ ਸਮੁੰਦਰ, ਟੁੰਢੇ ਬੰਨੇ ਪਾਣੀ ਝੱਟਣਾ ਕੀ
ਭਰੀਆਂ ਵਿੱਚੋਂ ਡਿੱਗੇ ਸਿੱਟੇ, ਜਿਹੜੇ ਚੁਗਦੇ ਫਿਰਦੇ ਲੋਕ,
ਉਹਨਾਂ ਲੋਕਾਂ ਗਾਹਣਾ ਕੀ ਏ, ਉਹਨਾਂ ਲੋਕਾਂ ਛੱਟਣਾ ਕੀ।
ਜੱਗ ਤੇ ਕਿਹੜੀ ਸੰਘੀ ਜਿਹਨੂੰ ਹੱਥ ਅਜ਼ਲ ਦਾ ਪੈਣਾ ਨਈਂ,
ਫਿਰ ਕੀ ਡਰਨਾ ਜ਼ਾਲਿਮ ਕੋਲੋਂ, ਵਿੱਚ ਮੈਦਾਨੋਂ ਨੱਠਣਾ ਕੀ।
ਸਾਡਾ ਰਿਜਕ ਵੀ ਨੱਠਾ ਫਿਰਦਾ, ਰੁੱਖੋਂ ਟੁੱਟੇ ਪੱਤਿਆਂ ਵਾਂਗ,
ਨੇਜ਼ੇ ਚੜ੍ਹੀਆਂ, ਤਿੱਖੀਆਂ, ਧੁੱਪਾਂ, ਸਾਡੇ ਸਿਰ ਤੋਂ ਹਟਣਾ ਕੀ।
ਝੁੱਗੀ ਸਿਰ ਤੇ ਭਾਰ ਵੀ ਉਹਦਾ, ਫਿਰੀਏ ਉਹਦੀ ਵਿੱਚ ਜ਼ਮੀਨ,
ਅਸਾਂ ਕੀ ਆਨੇ ਟੱਡਣੇ ਬਾਬਾ, ਉਹਦੇ ਅੱਗੇ ਡੱਟਣਾ ਕੀ।
-0-
