ਉੱਠ ਗਰੀਬਾ ਭੰਗੜਾ ਪਾ
ਭੁੱਖਾ ਆਪਣਾ ਢਿੱਡ ਵਜਾ
ਜਸ਼ਨੇ-ਪਾਕਿਸਤਾਨ ਮਨਾ
ਪੂਰਾ ਪਾਕਿਸਤਾਨ ਅਸੀਂ
ਤਾਹੀਓਂ ਤੇ ਪ੍ਰਧਾਨ ਅਸੀਂ
ਧਰਤੀ ਵੀ ਅਸਮਾਨ ਅਸੀਂ
ਸਾਡੇ ਪੈਰਾਂ ਥੱਲੇ ਲਾ
ਸਾਡੇ ਬਹਿ ਕੇ ਪੈਰ ਦਬਾ
ਉੱਠ ਗਰੀਬਾ ਭੰਗੜਾ ਪਾ
ਭੁੱਖਾ ਆਪਣਾ ਢਿੱਡ ਵਜਾ
ਜਸ਼ਨੇ-ਪਾਕਿਸਤਾਨ ਮਨਾ
ਢਿੱਡੋਂ ਭਾਵੇਂ ਭੁੱਖਾ ਰਹੁ
'ਜੀਵੇ ਜੀਵੇ' ਧਰਤੀ ਕਹੁ
ਧੁੱਪੇ ਭਾਵੇਂ, ਛਾਵੇਂ ਬਹੁ
ਸੱਧਰਾਂ ਉੱਤੇ ਮਿੱਟੀ ਪਾ
ਸਾਡੇ ਅੱਗੇ ਧੌਣ ਝੁਕਾ
ਉੱਠ ਗਰੀਬਾ ਭੰਗੜਾ ਪਾ
ਭੁੱਖਾ ਆਪਣਾ ਢਿੱਡ ਵਜਾ
ਜਸ਼ਨੇ-ਪਾਕਿਸਤਾਨ ਮਨਾ
ਤੈਨੂੰ ਧਰਤੀ ਸੁਹਣੀ ਲੱਗੇ
ਸ਼ਾਵਾ ਸ਼ਾਵਾ ਅੰਨ੍ਹੇ ਢੱਗੇ
ਤਾਹੀਓਂ ਤੈਨੂੰ ਕਰ ਕੇ ਅੱਗੇ
ਡਾਂਗਾਂ ਸੋਟੇ, ਗੋਲੀ, ਖਾਹ
ਵਿੱਚ ਸ਼ਰੀਕਾਂ ਨਾਂ ਚਮਕਾ
ਉੱਠ ਗਰੀਬਾ ਭੰਗੜਾ ਪਾ
ਭੁੱਖਾ ਆਪਣਾ ਢਿੱਡ ਵਜਾ
ਜਸ਼ਨੇ-ਪਾਕਿਸਤਾਨ ਮਨਾ
