5. ਨਾਅਤ (ਪ੍ਰਾਰਥਨਾ)
ਮੈਨੂੰ ਵੀ ਇੱਕ ਵਾਰ ਕਰਾਦੇ, ਤੂੰ ਦੀਦਾਰ ਮਦੀਨੇ ਦਾ।
ਮੇਰੇ ਆਇਆਂ ਹੋ ਨਈਂ ਜਾਂਦਾ, ਤੰਗ ਬਾਜ਼ਾਰ ਮਦੀਨੇ ਦਾ।
ਤੇਰੀ ਜ਼ਾਤ ਨਾ ਹੁੰਦੀ ਏਥੇ, ਮੂੰਹ ਨਾ ਕਰਦਾ ਏਧਰ ਮੈਂ,
ਤੇਰੀ ਜ਼ਾਤ ਬਣਾ ਦਿੱਤਾ ਏ ਖਿਦਮਤਗਾਰ ਮਦੀਨੇ ਦਾ।
ਸ਼ੱਕਰ ਨਾਲੋਂ ਮਿੱਠੀ ਲੱਗੇ, ਮਿੱਟੀ ਤੇਰੀ ਧਰਤੀ ਦੀ,
ਸੂਲਾਂ ਵਾਂਗੂੰ ਚੁਭਿਆ ਮੈਨੂੰ, ਚੌਕੀਦਾਰ ਮਦੀਨੇ ਦਾ।
ਸੱਭੇ ਸੋਚਾਂ, ਸੱਭੇ ਸੱਧਰਾਂ, ਵੇਖ ਕੇ ਮਿੱਟੀ ਹੋਈਆਂ ਨੇ,
ਏਥੇ ਵੀ ਸਰਦਾਰਾਂ ਹੱਥ ਏ ਕਾਰੋਬਾਰ ਮਦੀਨੇ ਦਾ।
ਇਸ ਧਰਤੀ ਦੇ ਹਰ ਬੰਦੇ ਨੂੰ ਲੋੜਾਂ ਦੀ ਬੀਮਾਰੀ ਏ,
ਖੌਰੇ ਕਿਸਰਾਂ ਰਾਜ਼ੀ ਕਰਦਾ, ਇੱਕ ਅਨਾਰ ਮਦੀਨੇ ਦਾ।
ਲੱਗ ਜਾਵਣ ਦੇ ਬੂਟੇ ਏਥੇ, ਰੰਗ ਬਰੰਗੇ ਫੁੱਲਾਂ ਦੇ,
ਹੋਰ ਵੀ ਸੁਹਣਾ ਬਣ ਜਾਵੇਗਾ ਫਿਰ ਗੁਲਜ਼ਾਰ ਮਦੀਨੇ ਦਾ।
ਹੁਣ ਤੱਕ ਸਾਰੀ ਦੁਨੀਆ 'ਬਾਬਾ' ਮੇਰੀ ਜੂਹ ਵਿੱਚ ਆ ਜਾਂਦੀ,
ਮੁਸਲਾ ਜੇ ਨਾ 'ਕੱਲਾ ਬਣਦਾ ਦਾਅਵੇਦਾਰ ਮਦੀਨੇ ਦਾ।
ਫਜਰ ਤੋਂ ਲੈ ਕੇ ਸ਼ਾਮਾ ਤੀਕਰ ਟੁੱਕਰ ਪੂਰਾ ਹੁੰਦਾ ਨਈ,
'ਬਾਬਾ ਨਜਮੀ' ਕਿੰਝ ਖਰੀਦਾਂ ਜਾ ਕੇ ਹਾਰ ਮਦੀਨੇ ਦਾ।
-0-
