6. ਲਿਖਦਾ ਕਿਉਂ ਨਈਂ ਸੱਚੇ ਅੱਖਰ?
ਖੌਰੇ ਕੌਣ ਏ ਜਿਹੜਾ ਮੈਨੂੰ
ਅਕਸਰ ਟੁੰਬਦਾ ਰਹਿੰਦਾ ਏ
ਸ਼ਾਮ ਸਵੇਰੇ ਕਹਿੰਦਾ ਏ
ਤੈਨੂੰ ਲਿਖਣਾ ਆਉਂਦਾ ਏ
ਤੈਨੂੰ ਲਿਖਣਾ ਚਾਹੀਦਾ ਏ
ਲਿਖਦਾ ਕਿਉਂ ਨਈਂ ਸੱਚੇ ਅੱਖਰ?
ਲੋਕਾਂ ਤੀਕ ਅਪੜਾਉਂਦਾ ਕਿਉਂ ਨਈਂ
ਸੱਚਿਆ, ਸੱਚ ਸੁਣਾਉਂਦਾ ਕਿਉਂ ਨਈਂ
ਪਾਇਆ ਢੋਲ ਵਜਾਉਂਦਾ ਕਿਉਂ ਨਈਂ
ਆਪਣਾ ਫਰਜ਼ ਨਿਭਾਉਂਦਾ ਕਿਉਂ ਨਈਂ
ਲਿਖਦਾ ਕਿਉਂ ਨਈਂ ਸੱਚੇ ਅੱਖਰ?
ਚਿੱਠੀ ਚੜ੍ਹਦੇ ਲਹਿੰਦੇ ਲਿਖ ਦੇ
ਵਿੱਚ ਹਨੇਰਾ ਰਹਿੰਦੇ ਲਿਖ ਦੇ
ਲੋਕੀ ਜੋ ਨੇ ਕਹਿੰਦੇ ਲਿਖ ਦੇ
ਜਿਹੜੇ ਦੁੱਖ ਨੇ ਸਹਿੰਦੇ ਲਿਖ ਦੇ
ਲਿਖਦਾ ਕਿਉਂ ਨਈਂ ਸੱਚੇ ਅੱਖਰ?
ਜ਼ਾਲਿਮ ਕੋਲੋਂ ਡਰਦਾ ਰਹੇਂਗਾ
ਅੱਲਾ ਦੀ ਸਹੁੰ ਮਰਦਾ ਰਹੇਂਗਾ
ਛਿੱਤਰ ਸਿੱਧੇ ਕਰਦਾ ਰਹੇਂਗਾ
ਪਾਣੀ 'ਬਾਬਾ' ਭਰਦਾ ਰਹੇਂਗਾ
ਲਿਖਦਾ ਕਿਉਂ ਨਈਂ ਸੱਚੇ ਅੱਖਰ?
