ਖਲਕਤ ਦੀ ਖਿਦਮਤ ਨਾਲ-

ਕਿਸੇ ਮੈਨੂੰ ਆਖਿਆ ।

 

ਯਕੀਨ ਲਿਆਓ, ਆਪ ਸੰਵਾਰੋ, ਅਰਦਾਸ ਨਾਲ,

ਭਗਤੀ ਕਰੋ, ਕੀਰਤਨ, ਭਾਵਨਾਂ ਤੇ ਭੈ ਨਾਲ;

ਆਸ ਰਖੋ, ਹਰ ਰੰਗ, ਹਰ ਵੇਲੇ, ਹਰ ਨਾਲ;

ਦੁਖ ਭੋਗੋ, ਭਾਣਾ ਮੰਨੋ, ਖੁਸ਼ੀ ਅਨੰਦ ਨਾਲ-

ਇਉਂ 'ਉਹ' ਲੱਭਦਾ-

ਕਿਸੇ ਉਪਦੇਸ਼ਿਆ ।

 

ਗੁਰੂ ਧਾਰੋ,

ਵੇਲੇ ਵੇਲੇ ਹਰ ਸਮੇਂ ਰੱਬ ਨੇ ਜੋ ਘੱਲਿਆ;

ਹੁੱਜਤਾਂ ਨਾ, ਦਲੀਲ ਨਾ, ਹੁਕਮ ਮੰਨੋ, ਮੁਰਦਾ ਹੋਇ ਮੁਰੀਦ;

ਸੇਵਾ ਕਰੋ, ਮਨ ਨਾਲ, ਮਨ ਮਾਰ;

ਭਜਨ ਅਤੇ ਬੰਦਗੀ, ਅੱਖਾਂ ਮੀਟ ਦਿਲ ਨਾਲ-

ਇਉਂ 'ਉਹ' ਲਭਸੀ-

ਕਿਸੇ ਨੇ ਇਹ ਆਖਿਆ ।

 

ਥੱਕਾ ਹੋਇਆ ਪਾਂਧੀ ਸਾਂ ਮੈਂ, ਹੋਰ ਥੱਕਿਆ,

ਬਿਨ ਰਾਹ ਰਾਹੀ ਸਾਂ ਮੈਂ, ਹੋਰ ਭੌਂਦਲਿਆ,

ਗੁਆਚ ਗਿਆ ਮੈਂ, ਉਫ਼ ! ਗੁਆਚਿਆਂ ਦੀ ਕੰਨ ਧਰ,

ਤੂੰ ਆਇਓਂ ਫੇਰ ਮੇਰੇ ਕੋਲ, ਆਪੂੰ ਚਲ ਕੇ ।