ਟੁਰਿਆ ਟੁਰਿਆ ਜਾਂਦਾ, ਉਹਨਾਂ ਮਾੜਿਆਂ ਵੰਨੀ,

ਧਤਕਾਰਿਆ ਜਿਨ੍ਹਾਂ ਨੂੰ ਸਾਰੀ ਖ਼ਲਕਤ ਨੇ,

ਤੂੰ ਲੰਘਦਾ ਉਹਨਾਂ ਦੀ ਗਲੀ,

ਵੜਦਾ ਉਹਨਾਂ ਦੇ ਅੰਦਰੀਂ,

ਬੈਠਦਾ ਉਹਨਾਂ ਦੇ ਨਾਲ, ਟੁੱਟੇ ਤੱਪੜਾਂ 'ਤੇ,

ਹੱਸਦਾ ਖੇਡਦਾ ਉਹਨਾਂ ਦੇ ਨਾਲ ਜਿਨ੍ਹਾਂ ਨਾਲ ਨਾ ਹੱਸਦਾ ਕੋਈ,

ਹੱਸਦੇ ਜਿਨ੍ਹਾਂ ਨੂੰ ਸਾਰੇ,

ਖਾਂਦਾ ਉਹਨਾਂ ਦੀਆਂ ਬੇਹੀਆਂ ਰੋਟੀਆਂ ਮੋਟੀਆਂ,

ਪੀਂਦਾ ਪਾਣੀ ਉਹਨਾਂ ਦੇ ਪਿਆਲਿਓਂ,

ਤੇ ਸੁਣਾਂਦਾ ਉਹਨਾਂ ਨੂੰ ਮਿੱਠੀਆਂ ਮਿੱਠੀਆਂ ਗੱਲਾਂ ਆਪਣੇ ਬਾਪੂ ਦੀਆਂ ।

 

ਉਹ ਜਾਣਦੇ ਕੋਈ ਪਾਤਸ਼ਾਹ ਉਤਰਿਆ ਅਸਾਡੇ,

ਪਾਤਸ਼ਾਹਾਂ ਦੀ ਪਰਵਾਹ ਨਾ ਰਖਦੇ ਮੁੜ ਉਹ ।

ਤੂੰ ਜਾਂਦਾ ਉਹਨਾਂ ਦੇ ਘਰ,

ਜਿਨ੍ਹਾਂ ਨੂੰ ਗੁਨਾਹਗਾਰ ਆਖਦੇ ਲੋਕ, ਪਾਕ ਵੱਡੇ ।

ਤੂੰ ਬਖ਼ਸ਼ਸ਼ਾਂ ਦਾ ਖ਼ਜ਼ਾਨਾ ਖਿਮਾਂ ਦਾ ਭੰਡਾਰ,

ਕੋਈ ਨੀਵਾਂ ਨਾ ਤੇਰੇ ਲਈ,

ਨਾ ਕੋਈ ਗੁਨਾਹਕਾਰ ਬੰਦਾ ਨਾ ਜ਼ਨਾਨੀ,

ਤੂੰ ਸੁਣਾਂਦਾ ਉਹਨਾਂ ਨੂੰ ਆਪਣੇ ਬਾਪੂ ਦੀਆਂ ਬਖ਼ਸ਼ਸ਼ਾਂ ਦੇ ਕਿੱਸੇ,

ਤੇ ਪਏ ਅੱਗੋਂ ਆਪ ਬਖ਼ਸ਼ਸ਼ਾਂ ਕਰਦੇ,

ਏਨੀਆਂ ਬਖ਼ਸ਼ਸ਼ਾਂ ਹੁੰਦੀਆਂ ਉਹਨਾਂ ਤੋਂ !