ਆ ਤੇਰੇ ਨਾਲ ਅੱਖੀਆਂ ਚਾਰ ਕਰਾਂ,
ਆ ਰਤਾ ਤੈਨੂੰ ਸਰਮਸਾਰ ਕਰਾਂ।
ਨੈਣ ਵਿਚ ਜੋਤ ਵੀ ਚਮਕ ਵੀ ਹੈ,
ਹੰਝੂ ਹੋਵੇ ਤਾਂ ਜਿੰਦ ਨਿਸਾਰ ਕਰਾਂ ।
ਮੈਂ ਤਾਂ ਬੰਦੇ ਨੂੰ ਸਮਝਦਾ ਹਾਂ ਖ਼ੁਦਾ,
ਕਿੱਥੇ ਬੰਦਾ ਹੈ ਨਮਸਕਾਰ ਕਰਾਂ ।
ਜਿਸ ਨੂੰ ਪਤਝੜ ਦਾ ਡੰਗ ਨਾ ਪੋਹੇ,
ਜਿੰਦ ਉਸਦੀ ਨੂੰ ਕਿਉਂ ਬਹਾਰ ਕਰਾਂ ।
ਜਿਹੜੇ ਰਸਤੇ ਅੰਗਾਰ ਨ ਕੋਈ,
ਉਸ ਤੋਂ ਰਾਹੀ ਨੂੰ ਹੋਸ਼ਿਆਰ ਕਰਾਂ ।
ਸੁਪਨੇ ਸੋਹਣੇ ਨੇ ਪਰ ਛਲਾਵਾ ਨੇ,
ਜਾਗ ਸੁਪਨੇ ਤਿਰੇ ਸਕਾਰ ਕਰਾਂ।
ਕੁਝ ਤਾਂ ਦੁਨੀਆਂ ਨੂੰ ਵੇਖ ਚੁੱਕਾ ਹਾਂ,
ਫਿਰ ਵੀ ਦੁਨੀਆਂ ਤੇ ਏਤਬਾਰ ਕਰਾਂ ।
ਅਜ ਜ਼ਮਾਨੇ ਤੇ ਮਿਹਰਬਾਨ ਹਾਂ ਮੈਂ,
ਅੱਜ ਜ਼ਮਾਨੇ ਨੂੰ ਬੇਕਰਾਰ ਕਰਾਂ ।
