ਹੁਣ ਤਾਂ ਸਾਡੀਆਂ ਅੱਖਾਂ ਥੱਕੀਆਂ
ਅੰਬਰੀਂ ਉੱਗਿਆ ਤਾਰਾ ਤਾਰਾ
ਆ ਵੀ ਜਾ ਓ ਰਾਂਝਣ ਯਾਰਾ।
ਤੇਰੇ ਬਾਝ ਹਨੇਰਾ ਜਾਪੇ
ਚੰਨ ਚਾਨਣੀ ਬੁੱਝ ਗਈ ਆਪੇ
ਤੱਕਾਂਗੀ ਮੈਂ ਕਿੰਝ ਨਜ਼ਾਰਾ
ਆ ਵੀ ਜਾ ਓ ਰਾਂਝਣ ਯਾਰਾ ।
ਆਲਣਿਆਂ ਨੂੰ ਪੰਛੀ ਆਏ
ਜਿੰਦ ਨਿਮਾਣੀ ਡੁੱਬਦੀ ਜਾਏ
ਟੁੱਟਦਾ ਜਾਏ ਸਾਹ ਵਿਚਾਰਾ
ਆ ਵੀ ਜਾ ਓ ਰਾਂਝਣ ਯਾਰਾ ।
ਘੜੀ ਮੁੜੀ ਮੈਨੂੰ ਚੈਨ ਨਾਂ ਆਵੇ
ਦਿਲ ਦੀ ਬੇੜੀ ਗ਼ੋਤੇ ਖਾਵੇ
ਸਾਗਰ ਤੋਂ ਕਿਉਂ ਦੂਰ ਕਿਨਾਰਾ
ਆ ਵੀ ਜਾ ਓ ਰਾਂਝਣ ਯਾਰਾ ।
ਮਾਰਾਂ ਹੱਥ ਧਤੂਰੇ ਅੱਕੀਂ
ਜੇ ਤੂੰ ਦੇਵੇਂ ਆਪਣੇ ਹੱਥੀਂ
ਜ਼ਹਿਰ ਪਿਆਲਾ ਲੱਗੇ ਖਾਰਾ
ਆ ਵੀ ਜਾ ਓ ਰਾਂਝਣ ਯਾਰਾ ।
