ਆ ਜਾ ਨੇੜੇ ਨੇੜੇ, ਲਾਟਾਂ ਵਾਲੀਏ!
ਦਿਲ ਮੇਰਾ ਨੀ ਸੱਖਣਾ ਨੂਰੋਂ,
ਤੇਰਾ ਚਾਨਣ ਪੈਂਦਾ ਦੂਰੋਂ,
ਅੱਧਾ ਚਾਨਣ, ਅੱਧ ਹਨੇਰਾ,
ਦਿਲ ਨ ਇੱਕੁਰ ਭਰਦਾ ਮੇਰਾ,
ਰਹਿੰਦਾ ਖ਼ਾਲਮ ਖ਼ਾਲੀ ਏ ਨੀ,
ਰਹਿੰਦਾ ਖ਼ਾਲਮ ਖ਼ਾਲੀ ਏ;
ਭਰ ਦੇ ਆ ਕੇ ਨੇੜੇ, ਲਾਟਾਂ ਵਾਲੀਏ!
ਇਸ ਨੂੰ ਨਾਲ ਚਾਨਣੇ ਭਰ ਦੇ,
ਇਸ ਨੂੰ ਜਗਮਗ ਜਗਮਗ ਕਰ ਦੇ,
ਕਿਰਨਾਂ ਦਾ ਇਕ ਨਾਚ ਨਚਾ ਦੇ,
ਝਰਨਾਟਾਂ ਦੀ ਰਾਸ ਰਚਾ ਦੇ,
ਰਾਤ ਜੋ ਏਨੀ ਕਾਲੀਏ ਨੀ,
ਰਾਤ ਜੋ ਏਨੀ ਕਾਲੀਏ;
ਕਰ ਦੇ ਆ ਕੇ ਚਾਨਣ, ਲਾਟਾਂ ਵਾਲੀਏ!
ਚਾਨਣ ਪਾਂਦੀ ਅੱਗ ਲਗਾ ਦੇ,
ਲੂੰਬੇ ਉੱਠਣ ਵਿਚ ਹਵਾ ਦੇ,
ਨੂਰ ਤਪਸ਼ ਦਾ ਇੱਕ ਹੁਲਾਰਾ
ਸ਼ੂਕਰ ਮਾਰੇ, ਉੱਚਾ ਸਾਰਾ,
ਸਭ ਕੁਝ ਓਸ 'ਚ ਬਾਲੀਏ ਨੀ,
ਸਭ ਕੁਝ ਓਸ 'ਚ ਬਾਲੀਏ;
ਆ ਜਾ ਨੇੜ ਨੇੜੇ, ਲਾਟਾਂ ਵਾਲੀਏ!
