ਆਪਣੇ ਵੱਲੋਂ ਮੈਂ ਉਹ ਕੀਤਾ ਵੱਧ ਤੋਂ ਵੱਧ ਜੋ ਕਰ ਸਕਦਾ ਸੀ
ਘੱਟ ਤੋਂ ਘੱਟ ਮੈਂ ਉਹਦੀ ਖ਼ਾਤਰ ਹੋਰ ਨਈਂ ਤਾਂ ਮਰ ਸਕਦਾ ਸੀ
ਉਹਦੇ ਪਿੱਛੋਂ ਨੈਣਾਂ ਦੇ ਵਿੱਚ ਏਨੇ ਅੱਥਰੂ ਭਰ ਭਰ ਸਾਂਭੇ
ਮੰਨ ਲੈਣੇ ਆਂ ਪੂਰਾ ਨਈ ਪਰ ਅੱਧਾ ਸਾਗਰ ਭਰ ਸਕਦਾ ਸੀ
ਲੈਕੇ ਬਹਿ ਗਿਆ ਲਾਡੋ ਰਾਣੀ ਸ਼ੀਸ਼ੇ ਸਾਂਹਵੇਂ ਸੰਗਣਾ ਤੇਰਾ
ਉਂਝ ਤੇ ਤੇਰੇ ਪਿਓ ਦਾ ਜੁੱਸਾ ਹਰ ਇੱਕ ਝੱਖੜ ਜਰ ਸਕਦਾ ਸੀ
ਅੱਕਕੇ ਆਖਿਰ ਆਕੜ ਲੈ ਗਈ ਸਾਰੀ ਬਾਜ਼ੀ ਖੋਹ ਕੇ ਸਾਥੋਂ
ਜਿੱਤਕੇ ਉਹਨੇ ਜੇ ਹੱਸਣਾ ਸੀ ਮੈਂ ਵੀ ਹੱਸਕੇ ਹਰ ਸਕਦਾ ਸੀ
ਧੁੱਪੇ ਕਾਹਨੂੰ ਸੜਨਾ ਪੈਂਦਾ ਜੇਕਰ ਸਾਰੇ ਗੌਤਮ ਹੁੰਦੇ
ਕਿੰਨਾ ਚੰਗਾ ਹੁੰਦਾ ਰੱਬਾ ਰੋਟੀ ਬਾਝੋਂ ਸਰ ਸਕਦਾ ਸੀ
