ਆਪਣੀ ਗੱਲ ਤੂੰ ਆਪੇ ਈ ਰੱਦ ਕਰਦਾ ਏਂ ।
ਮੂੰਹੋਂ ਜੋ ਕੁੱਝ ਕਹਿੰਦਾ ਏਂ ਉਹ ਕਦ ਕਰਦਾ ਏਂ ।
ਵੱਖਰੀ ਗੱਲ ਏ ਮੇਰੀਆਂ ਆਸਾਂ ਢਹੀਆਂ ਨਹੀਂ,
ਤੂੰ ਤੇ ਸੱਜਣਾਂ ਬੜਾ ਤਰੱਦਦ ਕਰਦਾ ਏਂ ।
ਸਾਡਾ ਸੱਚ ਵੀ ਤੋੜ ਨਾ ਚੜ੍ਹਿਆ, ਹਰਿਆ ਏ,
ਤੇਰਾ ਖੋਟ ਵੀ ਪੁੱਗਦਾ ਏ ਤਦ ਕਰਦਾ ਏਂ ।
ਨਵਾਂ ਸ਼ਿਕਾਰ ਕਰਨ ਦਾ ਲਗਦਾ ਚਾਰਾ ਏ,
ਖ਼ਾਲ, ਨਮਾਇਆ ਹੋਰ ਤਿੱਖੇ ਜਦ ਕਰਦਾ ਏਂ ।
ਲੋਕੀ ਤੇ ਖੰਭਾਂ ਤੋਂ ਡਾਰ ਬਣਾਉਂਦੇ ਨੇ,
ਗੱਲ ਨੂੰ ਗਹੁ ਨਾਲ ਜਾਚਿਆ ਕਰ ਜਦ ਕਰਦਾ ਏਂ ।
ਕਦ ਤੱਕ ਓੜਕ ਪੱਬਾਂ ਭਾਰ ਖਲੋਵੇਂਗਾ,
ਅੱਡੀਆਂ ਚੁੱਕ ਚੁੱਕ ਕਿਉਂ ਉੱਚਾ ਕੱਦ ਕਰਦਾ ਏਂ ।
ਚੀਕਾਂ ਕਿਧਰੇ ਲਲਕਾਰੇ ਨਾ ਬਣ ਜਾਵਣ,
ਸੋਚ ਲਿਆ ਕਰ ਜਦੋਂ ਤਸੱਦਦ ਕਰਦਾ ਏਂ ।
ਖ਼ੁਦ ਗ਼ਰਜ਼ਾਂ ਤੋਂ ਰੱਖ਼ੇਂ ਆਸ ਵਫ਼ਾਵਾਂ ਦੀ,
ਝੱਲਿਆ 'ਸ਼ੈਦਾ' ਤੂੰ ਵੀ ਤੇ ਹੱਦ ਕਰਦਾ ਏਂ ।
