ਆਹ ਦੇਖ
ਕਿੰਨੀ ਸੋਹਣੀ ਹੈ ਰਾਤ
ਕਰ ਸਕਦਾ ਕੋਈ
ਚੰਦ ਤੇ ਤਾਰਿਆਂ ਦੀ ਏਨੀ ਖ਼ੂਬਸੂਰਤ ਕਢਾਈ
ਤੇ ਓਹ ਵੀ ਏਡੇ ਅੰਬਰ ਦੀ ਦਸੂਤੀ ਉੱਤੇ
ਹੈਰਾਨ ਨਾ ਹੋ-ਦਿਲ ਤੋਂ ਪੁੱਛ ਕੇ ਦੱਸ?
ਏਡੀ ਵੱਡੀ ਚਾਦਰ ਫੁੱਲ ਕਢਾਈ
ਕੀ ਮੜ੍ਹ ਸਕਦਾ ਕੋਈ
ਤੇਰੇ ਮੁੱਖ ਵਰਗੀ ਲੋਅ
ਏਦਾਂ ਸੋਨ ਸੂਰਜੀ ਰਿਸ਼ਮਾਂ ਦੇ ਧਾਗਿਆਂ ਨਾਲ
ਧਰਤ ਤੇ ਹਰੀ ਘਾਹ
ਬਨਸਪਤੀ ਤੇ ਏਨੇ ਫੁੱਲ ਰੰਗ ਬਿਰੰਗੇ
ਤੇਰੀਆਂ ਵੰਗਾਂ ਵਰਗੇ
ਤੇਰੇ ਦਿਨ ਰਾਤ ਦੇ ਰੰਗਾਂ ਵਰਗੇ
ਤੇ ਤੇਰੀਆਂ ਸੰਗਾਂ ਵਰਗੇ
ਹੱਸਦੀ ਏਂ ਤਾਂ ਫੁੱਲ ਨੇ ਕਿਰਦੇ
ਨੱਚਦੀਂ ਏਂ ਤਾਂ ਅੰਬਰ ਨੱਚੇ
ਤਾਂਹੀਂ ਲਗਦਾ ਜੱਗ ਏ ਹੱਸੇ
ਤੇਰੇ ਸਹਾਰੇ ਦੁਨੀਆਂ ਵਸੇ
ਏਦਾਂ ਹੀ ਮੁਸਕਰਾਹਟਾਂ ਸੁਗੰਧੀਆਂ
ਸੂਹੇ ਹੋਟਾਂ ਤੋਂ ਖਿਲਾਰਦੀ ਰਿਹਾ ਕਰ
ਅਸੀਂ ਚੁਗ ਚੁਗ ਨਹੀਂ ਥੱਕਾਂਗੇ
ਆਪਸੀ ਗੱਲ ਸਈ ਕਿਸੇ ਨੂੰ ਨਹੀਂ ਦੱਸਾਂਗੇ
