ਅਚਾਨਕ ਹੀ ਕਈ ਵਾਰੀ ਇਹ ਹੱਥੋਂ ਛੁੱਟ ਜਾਂਦੇ ਨੇ ।
ਖਿਡੌਣੇ ਕੱਚ ਦੇ ਹੁੰਦੇ ਜੋ ਅਕਸਰ ਟੁੱਟ ਜਾਂਦੇ ਨੇ ।
ਤਰੰਨੁਮ ਛੇੜਦੇ ਮਨ ਵਿਚ ਹਵਾ ਦੇ ਸ਼ਬਨਮੀਂ ਝੋਂਕੇ
ਜਦੋਂ ਤੂਫਾਨ ਬਣ ਜਾਂਦੇ ਜੜੋਂ ਰੁਖ ਪੁੱਟ ਜਾਂਦੇ ਨੇ।
ਕੁਹਾਰਾਂ 'ਤੇ ਨਹੀਂ ਇਤਬਾਰ ਸਭ ਕੁਝ ਬਦਲ ਚੁੱਕਾ ਹੈ
ਸੁਣੀਂਦੇ ਹੁਣ ਤਾਂ ਹਰ ਡੋਲੀ ਨੂੰ ਰਾਹ ਵਿਚ ਲੁੱਟ ਜਾਂਦੇ ਨੇ।
ਕਿਸੇ 'ਤੇ ਰਹਿਮ ਜੇ ਕਰੀਏ ਤਾਂ ਜਾਂਦਾ ਕੁਝ ਨਹੀਂ ਭਾਂਵੇਂ
ਦੁਆਵਾਂ ਦੇਣ ਲੱਗੇ ਵੀ ਕਈ ਹੱਥ ਘੁੱਟ ਜਾਂਦੇ ਨੇ ।
ਹਰਿਕ ਬਸਤੀ ਹੀ ਦਿਸਦੀ ਏ, ਜਿਵੇਂ ਮਤਲਬ ਪਰਸਤਾਂ ਦੀ
ਕਿ ਅੱਗੇ ਜਾਣ ਲਈ ਦੂਜੇ ਨੂੰ ਪਿੱਛੇ ਸੁੱਟ ਜਾਂਦੇ ਨੇ ।
