ਐਨ-ਅਜਬ ਕੇਹੀ ਮੁਸ਼ਕਲ ਗੱਲ ਉਹ,
ਨੈਣੀਂ ਵਸਦਾ ਤੇ ਦਿਸਦਾ ਨ ।
ਇਹ ਗੁਲ ਨਰਗਸ ਮੈਂਡੀ ਉਤੇ,
ਵਾਂਗੂੰ ਤ੍ਰੇਲ ਦੇ ਤਸਦਾ ਦਿਸਦਾ ਨ ।
ਚਲ ਕਰਨ ਨੈਣ ਗਲ ਪੌਣ ਮੈਥੋਂ,
ਲੁਕ ਲੁਕ ਹਸਦਾ ਦਿਸਦਾ ਨ ।
ਚੰਦਨ ਬਾਗ਼(ਮਾਂਘ) ਬਹਾਰ ਫਿਰ ਆਈ,
ਪਰਬਤ ਕੁਸਦਾ ਦਿਸਦਾ ਨ ।
ਅਲੀ ਹੈਦਰ ਪਲਕਾਂ ਲੈਣ ਕਲਾਵੇ,
ਪਰਬਤ ਨਸਦਾ ਦਿਸਦਾ ਨ ।੧੮।
ਐਨ-ਅਬਸ ਦਾ ਐਵੇਂ ਕੰਮ
ਸਭੀ ਬਾਝੋਂ ਯਾਰ ਦਾ ਕਾਰੋਬਾਰ ਐਵੇਂ ।
ਤੇਲ ਫੁਲੇਲ ਤੇ ਚੰਬਾ ਐਵੇਂ,
ਕੂੜੇ ਹਾਰ ਸ਼ਿੰਗਾਰ ਐਵੇਂ ।
ਸੋਹਣੇ ਰੰਗ ਪਲੰਘ ਭੀ ਐਵੇਂ,
ਬਾਝ ਪੁੰਨੂੰ ਛਨਕਾਰ ਐਵੇਂ ।
ਹੈਦਰ ਬਾਗ਼ ਬਹਾਰ ਨੇ ਐਵੇਂ,
ਸੁੰਬਲ ਬਾਝ ਸੋਹਣੇ ਦਿਲਦਾਰ ਐਵੇਂ ।
